Itxi

Txirrindularitza

Denboraldi berria

Jonas Vingegaard Frantziako Tourrean eta Espainiako Vueltan arituko da 2025ean

EITB MEDIA

Visma Lease a Bike taldeko txirrindulari danimarkarrak Algarveko Itzulian hasiko du denboraldia, otsailaren 19tik 23ra bitartean. "Frantziako Tourra izango dut helburu nagusi", adierazi du, eta nabarmendu du, halaber, "asko" gustatuko litzaiokeela Espainiako Vuelta irabaztea.

  • Jonas Vingegaard, artxiboko irudian. Argazkia: EFE.

    Jonas Vingegaard, artxiboko irudian. Argazkia: EFE.

Visma Lease a Bike taldeko Jonas Vingegaard txirrindulari danimarkarra Frantziako Tourrean eta Espainiako Vueltan arituko da 2025eko denboraldian, asteartean Herbehereetako taldearen aurkezpenean baieztatu duenez. Vingegaardek Algarveko Itzulian hasiko du denboraldia, otsailaren 19tik 23ra bitartean: "Frantziako Tourra izango dut helburu nagusi", adierazi du, eta nabarmendu du, halaber, "asko" gustatuko litzaiokeela Espainiako Vuelta irabaztea.

Hala, Vingegaard, Algarveko Itzulia amaituta, Paris-Niza lasterketan izango da, martxoaren 9tik aurrera, eta, gerora, martxoaren 24an hastekoa den Kataluniako Itzulian. Ekainean, Dauphiné Libéré Kriteriumen arituko da, Frantziako Tourra prestatze aldera; azken proba horretan, baliteke Tadej Pogacarrekin bat egitea.

"Urte interesgarria izango da. Erakusten mailara bueltatu nahi dut, eta, Pogacarri gailentzeko, neure onenean izan beharko naiz. Uste dut iazko maila gainditu ahal dudala. Plana dugu gorenera iristeko, baina ezin dugu hori orain agerian jarri", azaldu du.

Visma Lease a Bike taldeak, horrez gain, zehaztu du Wout van Aert 2025eko Italiako Giroan izango dela; belgikarra ere ibiliko da Algarveko Itzulian.