Txirrindularitza
Valentziako Volta
Pello Bilbao, hirugarren Valentziako Voltako sailkapen nagusian, hirugarren etapan laugarren geratu ondoren
EITB MEDIA
Bahrain-Victorious taldeko txirrindularia irabazlearengandik 10 segundora iritsi da helmugara, eta sailkapen nagusiko hirugarren postura igo da. Joao Almeida da lider orain.
-
Pello Bilbao Valentziako Voltan. Argazkia: Valentziako Volta.
Ivan Romeo (Movistar) txirrindulari gazteak irabazi du Valentziako Voltako hirugarren etapa, Algemesi eta Alpuente artean, helmugarako 17 kilometrora erasoa jo eta faboritoen taldeari ihes eginda. Bestalde, Pello Bilbao (Bahrain-Victorious) txirrindulari bizkaitarra laugarren postuan iritsi da helmugara, irabazlearengandik 10 segundora, eta sailkapen nagusiko hirugarren postura igo da. Joao Almeida (UAE Emirates) da lider orain.
Urduritasunarekin hasi da etapa, Intermarche, Caja Rural, Seguros RG, Wagner-Bazin, Burgos BH eta Lidl Trek taldeetako txirrindulariak nahasi dituen eroriko handia izan baita. Mathias Vacek txekiarra lasterketako liderra izan da eroritakoen artean.
Tropelak sei txirrindulariren ihesaldia onartu du, Francisco Muñoz (Polti), Unai Iribar (Kern Pharma), Matteo Scalco (Bardianic FS), Walter Calzoni (Q36), Filippo Ridolfo (Novo Nordisk) eta Juan Jose Prieto (Petrolike) mexikarra tropelari aurrea hartuta ibili baitira.
Gailurretik 500 metrora, Santiago Buitrago kolonbiarrak erasoa jo du, eta Joao Almeidak bakarrik eutsi dio. Romeok berehala egin du jauzi, helmugatik 17 kilometrora, eta azkar ireki du 15 eta 20 segundoko tartea.
Valladolideko txirrindulariak abantaila kudeatzen jakin du, eta profesionala denetik lortu duen lehen garaipena eskuratu du horrela, atzetik esprintean Buitrago (bigarren) eta Almeida (hirugarren) sartu direlarik.
Horien atzetik, laugarren postuan, Pello Bilbao helmugaratu da, eta horri esker sailkapen nagusiko hirugarren postura igo da. Joao Almeida UAE Team Emirates taldeko portugaldarra da orain sailkapen nagusiko liderra.
Sailkapena
1 - ROMEO Iván (Movistar) 4:02:26
2 - BUITRAGO Santiago (Bahrain) +0:10
3 - ALMEIDA João (UAE) d. b.
4 - BILBAO Pello (Bahrain) d. b.
5 - CEPEDA Jefferson Alveiro (Movistar) d. b.
6 - CASTRILLO Pablo (Movistar) d. b.
7 - PIGANZOLI Davide (Polti VisitMalta) d. b.
8 - HINDLEY Jai (Red Bull - BORA - hansgrohe) d. b.
9 - ARENSMAN Thymen (Ineos) d. b.
10 - O'CONNOR Ben (Jayco) d. b.
