Artea
Erakusketa
20.000 kilometroko bidaiak laburbiltzen duten margolanak
Fernando Villenaren bost margolan ikusgai daude Rekalde aretoan. Azken lau urteotan Estatu Batuetan eta Europan zehar bidaiatzen izan da eta horren emaitza da erakusketa.
-
Fernando Villenaren erakusketa. Argazkia: EITB
Naturaren eta gizakiaren arteko harremana du abiapuntu Fernando Villena artista bilbotarrak. Naturatik jasotzen dituen koloreak margolanetara eramaten ditu. Villenak Estatu Batuetan eta Europan egin ditu bere koadroak, Bizkaiko Aldundiak gazteei laguntzeko duen bekari esker. Orain, bere lanak Rekalde aretoan daude ikusgai.
Rekalde aretoak Fernando Villena artista bilbotarraren erakusketa jarri du ikusgai Barriek 2013 programaren baitan. Apirilaren 14ra arte izango da ikusgai.
Bizkaiko Foru Aldundiko sorkuntza artistikorako bekak eskatu dituzten artistak aurkezteko helburuz abiarazitako programa da Barriek. Bizkaian lan egiten duten artista gazteen sorkuntza plastikoa sustatu eta artista horiei lehen urratsak ematen lagundu nahi die. Eta artista gazte horien artean dago Fernando Villena bilbotarra. 2001ean Arte Ederretan lizentziatu zen Euskal Herriko Unibertsitatean eta ondoren, New Yorken osatu zuen bere prestakuntza.
Rekalde aretoan apirilaren 14rarte izango dira ikusgai Villenak azken lau urteetan Estatu Batuetan eta Europan egindako paper gaineko bost margo akriliko. Naturak pizten du artistaren arreta eta horixe da bere praktika artistikoaren abiapuntua.
Fernando Villenak errealitatea sintetizatu eta forma organikoak bilatzen ditu, espazio planoak ikertuz. Naturan ikusten dituen koloreak ere zehaztu eta sailkatu egiten ditu.
