Artea
Gasteiz
Antonio Lopezek Gasteizko katedral berrirako sortuko du bere lehen lan erlijiosoa
Agentziak | Erredakzioa
Bizirik dela gurutziltzatutako Kristoren irudi bat izango da, egur polikromatuzkoa, eta tamaina naturalekoa baino handixeagoa.
-
Antonio López
Antonio Lopez espainiar artista bere lehen lan erlijiosoa sortzen ari da, Gasteizko katedral berrian jarriko duten Kristo gurutziltzatu bat.
Lopezek egitasmoaren berri emango dio Iñigo Urkullu lehendakariari, Raíces de Europa proiektua bultzatu duen kultura elkarteko kideek lagunduta; erakundeen babesari eta herritarren diru ekarpenei esker gauzatuko da eskultura.
Lopezek bere lehen artelan erlijiosoa gordeko duen tenplua, Gasteizko katedral berria, bisitatu zuen abenduan, eta, elkarteko kideek adierazi dutenez, esan zuen obrarako toki “bikaina, egokia eta inspiratzailea” dela, aldare aldea hutsik dagoenez ez delako eragozpenik egongo eskulturari arretaz begiratzeko.
Jose Alipio Morejon Raíces de Europaren zuzendariaren hitzetan, Tomellosoko (Ciudad Real) artista handiarena lan “oso berezia” izango da eta datorren urterako bukatuta egotea nahiko lukete.
Egur polikromatua erabiliz, bizirik dela gurutziltzatutako Kristoren irudi bat egitea da asmoa, begiradaren bidez “errukia” igorriko duena eta behatzailea babestuko duena, Juan Carlos Elizalde Gasteizko gotzainak azaldu duenez.
