Artea
Bilbo
Hamabi estreinaldi, BAD antzerki eta dantza jaialdiaren 13. edizioan
Erredakzioa
Urriaren 28tik azaroaren 6ra bitartean egingo dute Bilbon Antzerki eta Dantza garaikidearen BAD jaialdia, eta Angels Margarit izango da bertan. 2010ean, Dantza Sari Nazionala irabazi zuen Margaritek.
-
Angels Margarit. Argazkia: Angels Margarit dantzariaren webgunea.
Guztira, 21 talde izango dira BAD 2011 jaialdian, eta taularatuko dituzten ikuskizunen artean 12 dira erabateko estreinaldiak. Beste bost ikuskizun lehen aldiz eskainiko dira Euskadin, eta bi Estatu mailako estreinaldiak izango dira. Aipatzekoa da 'Le tango du cheval' Salia Ni Seydu konpainiak Bilbora ekarriko duen dantza ikuskizuna, zaldien munduan oinarrituta. Estatuan lehen aldiz egongo da berori ikusteko aukera.
Arkadi Zaides Israelen bizi den koreografo sobietar ohiaren 'Quiet' dantza ikuskizuna ere estreinaldietako bat izango da, eta Henrik Kaalund dantzari eta koreografoak 'Dreame' ekarriko du Bilbora.
Aurreko edizioetako hamabi eszenatokiekin batera, beste hainbat espazio berri ere izango dira aurten: Alondegia, EHUko paraninfoa, 6. Pabilioia, Euskalduna Ontziolaren lurrak izandakoak, Vista Alegre zezen plaza ('Itineris Apur BAD' ikuskizunaren egoitza izango da hau), eta aurtengo edizioan laguntzaile berezia izango den Miró hotela. Bertan arituko da Angels Margarit dantzari eta koreografo katalana, 'Miro 83. Solo para habitación' ikuskizunarekin.
Bilboko azken urteetako historiaren inguruko soinu eta bideo artxibo asko eta asko bildu ondoren, 'Tan sólo un trozo de historia que se repite' ikuskizuna sortu dute Mike Brooks (Ingalaterra, 1965) eta Rosa Casado (Madril, 1971) artistek. Ikuskizuna Euskalduna kaian estreinatuko da, ontziola zegoen tokian.
