Asier Altunaren pelikula ikasturteko azken Hitzetik Hortzeran

Asier Altuna Iza zinemagilea da. Hamaika lan egindakoa da ikus-entzunezkoetan. Ezagunena seguru asko, Telmo Esnalekin batera 2005ean estreinatutako Aupa Etxebeste komedia da. Laster Bertsolari aurkeztuko du, bakarka zuzendu duen lehendabiziko film luzea. Bertsolaritza zer den azaltzeko helburuaz hasi zen proiektua lantzen Altuna 2009ko Txapelketa Nagusian.

Ondoren hainbat elkarrizketa egin zituen gidoiari forma eman eta zer eta nola grabatu erabakitzeko. Egunotan ari da azken ukituak ematen eta pozik dago lanak hasierako helburua betetzen duela uste baitu. Aspalditxotik dago dokumentalaren aurrerapena sarean, aurrez erakutsi gabeko irudiak ekarri ditu ordea Altunak Hitzetik Hortzerara. 2010ean Maialen Lujanbio eta Andoni Egañarekin Amerikako Estatu Batuetara egindako bidaian hartutakoak dira, San Franciscon hain zuzen ere.

Arrangoitzetik Mallabira

Sortu berria den Hats Berri elkarteak antolatuta saio xelebrea egin dute Arrangoitzen: Bertsu Battle Kontezt-a. Ring baten barnean bi taldetan banatuta aritu ziren bertsolariak. Berdeen taldean Xumai Murua, Odei Barroso eta Igor Elortza; Gorriak izan ziren Unai Iturriaga, Gillen Hiribarren eta Eneritz Zabaleta. Denetariko ariketak agindu zizkien Iban Iturbide Peru gai-jartzaileak. Saiora bildutako bertsozaleek erabaki zuten, txartel gorri zein berdeak erakutsiz, nori jantzi irabazleari agindutako ‘Mattinen gerrikoa’. Mallabikoa ere ederto atera zen. Beñat Ugartetxea gaiak proposatzen zutela jardun ziren Izar Gorri elkartean Beñat Gaztelumendi eta bezperan Arrangoitzen izandako Odei Barroso.

Zuri-beltzekoan turistei botatakoak

Zuri-beltzekoan 1968an Donostian egindako saio batean Joxe Lizasok turistei kantatutakoak. Zapping-ean garai bateko eskolarteko txapelketetako irudiak eta Jasotakoa, berriz, Aizarnazabaldik bidalia: Xabier Zeberio eta Joxe Luix Gorrotxategi bertso-afaritan.

Igandean, 21:00etan, ETB1en. Eta bezperatik ikusgai eitb.com-en.