Bertsolaritza
Bertsolaritza
Hitzetik Hortzeran izango da aste honetan Jon Maia
Berak zuzendu duen Gazta zati bat pelikulako irudiak erakutsiko ditu. Aurrerantzean, larunbat bazkalostean, 14.45etan, emango dute bertso-programa, Gaur Egunen ostean.
-
Jon Maia eta Jon Artano, Hitzetik Hortzeran. Argazkia: EITB
Jon Maia izango da aste honetako saioan gonbidatua. Duela hiru urte hasi zen bertsolari zumaiarra, Idiazabalgo Nazioen Mundua elkarteak eskatuta, herri ekimen horren jarraipena egiten. Talde horren ibiliaren lekukotza jaso behar zuen ikus-entzunezkoak hasiera batean, baina poliki-poliki asmoa handitu eta Euskal Herrian azken garaiotan bizi ditugun gertakari politiko eta sozialen isla jaso nahi du udaberrian estreinatuko duten pelikulak. Gazta zati bat-The piece of cheese proiektuaren gorabeherak kontatuko ditu Maiak.
Gainera Amurrion, Errege Eguneko urteroko zitan, Euskal Herriko Txapelketako azken zortzi finalistekin izandako jaialdiko onena ere emango dute; baita Zumaian urtarrilaren 7an izan zen bertso afarian Iker Zubeldiak eta Anjel Mari Peñagarikanok utzitako zirikada bizienak ere.
Hitzetik Hortzera, larunbat bazkalostean ETB1en, eta EITB Nahieranen
