'15M. Voces de una revolución' komikiak 'suminduak' omendu ditu

Panini Comics argitaletxeak "15M. Voces de una revolución" komikia kaleratu berri du, M-15 mugimenduaren harira, sistemaren aurka protestatzeko kalera irten ziren herritarrak omentzeko asmoz.

Patricio Clarey marrazkigilea eta Lara Fuente gidoigilea dira komiki honen egileak. Haiek ere Catalunya Plazan izandako elkarretaratzetanparte hartu zuten. Halaber, "inoiz ongi funtzionatu ez duen sistema politiko eta ekonomiko baten aurka protestatzeko Espainiako hainbat plazetan bildu ziren herritarrak hilezkortu" nahi izan dute.

Komiki honek mugimenduaren hasierari egiten dio aipamena ("dena Islandian hasi zen, nazioarteko mailan bizi-kalitate handiena duen herrialdean"). Ondoren, maila sozial desberdinetako lagunen hitzak jasotzen dituzte.

Fuentesek azaldu duenez, protagonistak ez dira benetakoak baina mugimenduarekin bat egin zutenen ordezkariak dira. Halaber, arratoiek, txerriek eta tximinoek buruzagiak, enpresariak eta bankariak irudikatzen dituzte.

"Ohiko metafora bisuala da. Gizateria arraza menperatzailea da, pentsatzeko gaitasuna eta gauza handiak sortzeko tresnak dituena, baina komikian, animalien marrazkien bitartez, gizakiak txarto egin duena eta gizartea kaltetu duena azaltzen dugu", adierazi du Clareyk.

Marrazteko teknika zaindua eta tonu berde eta grisako estetika goibela erakusten du argitalpenak, "egun jendeak pairatzen duen etsipen sentimendua" igortzeko asmoz. Giza Eskubideen Aitorpen Unibertsalaren artikuluek hasiera ematen diote zazpi kapitulutan antolatutako istorio honi.