Steve Jobsen inguruko komiki biografikoa, salgai

Bluewater Productions argitaletxeak jende ezagunaren inguruko komikiak argitaratzen ditu eta Apple etxeko sortzailearen inguruko ale berezi baten kaleratzea iragarri du. Gainera, martxoan Bill Gates Microsofteko sortzailearen inguruko argitalpena helduko dela jakinarazi dute.

2011ko ekainean eman zuten proiektuaren berri eta 3,99 dolarreko salneurriarekin eskuratu daiteke formatu digitalean eta Estatu Batuetako liburu dendetan erosi daiteke, baita Amazonen ere, asteazkenetik aurrera.

"Steve Jobs: Founder of Apple" (Steve Jobs: Appleko sortzailea) komikiak iPhonearen eta iPadaren egilearen ibilbide profesionala eta pertsonalitate "konplexua" du aztergai.

"Mirets ezazu edo bere aurka egin ezazu, baina Jobsen ikuspegiak eta negozioetarako zuen zorroztasunak mundua aldatu zuen", adierazi du CW Cook egileak. Jobsek eta Gatesek gizakiok komunikatzeko ditugun moduetan eragin handia izan zutela gaineratu du komikiaren egileak.

Jobsen biografiaren aurretik, Bluewater Productionsek Mark Zuckerbergen inguruko alea eskaini zuen. "Antzekotasun handiak daude Zuckerberg, Jobs eta Gatesen artean. Bultzada mota berezia behar da gizartea aurrera eramateko", adierazi du Cookek.

32 orrialde ditu "Steve Jobs: Founder of Apple" komikiak eta bertan ez da sagarraren enpresaren heriotza azaltzen. Joan den urrian hil zen Jobs eta proiektua aurretik idatzi zuten, argitaletxeak jakinarazi duenez.