Katakrak argitaletxeak "Puta zikinak" liburuari Baionan egindako erasoa salatu du

Katakrak argitaletxeak salatu du otsail amaieran talde "integrista eta transfobo" bat Baionako liburu denda batera sartu, eta "Puta zikinak. Sexu-langileen aldeko eskubideen borroka" beraiek argitaratutako lanaren ale guztiak deuseztatu zituela; "ale bakar bat ere ez zen osorik eta txukun geratu", ohar batean azaldu dutenez.  

Juno Mac eta Molly Smith Eskoziako sexu-langile eta Sex Worker Advocacy and Resistence Movement taldeko militanteek "feminismoan inor soberan ez dagoen ustetik" idatzitako lana da "Puta zikinak. Sexu langileen aldeko eskubideen borroka", eta, Katakrakek azaltzen duenez, sexu langileek "kapitalismoaren eta patriarkatuaren aldetik legeen bidez, polizien bidez, muga politiken bidez, hedabideen marko komunikatiboen bidez eta gizon misoginoen indarkeriaren bidez jasaten duten zapalkuntzaren inguruko azterketa landu eta zehatza" da.

Bost puntuko oharrean, argitaletxeak adierazi du "Baionako gertuko historiako garairik ilunenak" ekartzen dituztela gogora liburuen aurkako erasoek, "XX. mendeko 20ko eta 30eko hamarkadetakoak", eta gaineratu du larria dela, halaber, euskarazko liburu bati erasotzea Lapurdin euskarazko liburuei tokia eskaintzen dien liburu denda bakarretako batean.  

Azkenik, "hitza, eztabaida eta izpiritu kritikoa" aldarrikatu dituzte, erasoen aurrean, eta gogora ekarri dute, liburu guztiekin bezala, ez dela zertan liburu honek dioenarekin ados egon: "Inor ez dago irakurtzera behartua, inor ez dago erostera behartua, are irakur daiteke eta kritika zorrotza egin. Baina liburuak hondatzea, dendariak, editoreak eta egileak beldurtzeko asmoz, hori beste zerbait da, garai autoritario, sektario eta erasokorren adierazgarri".  

Argitaletxearen arduradunek azaldu digutenez, 10 urteko bidean ez dute sekula pareko erasorik jaso, denetariko liburu konprometituak argitaratu eta saldu badituzte ere.