Literatura
Klasikoen XVIII. Irakurketa
400 lagunek Bizenta Mogelen "Ipuin onak" irakurriko dute ostegunean, Arriagan
N. V. | EITB Media
Emakume batek argitaratu zuen euskarazko lehen liburua aukeratu dute Bilbo Zaharra euskaltegikoek Klasikoen Irakurketa Etenik Gabearen XVIII. ediziorako. Nerea Ibarzabal markinar idazle eta bertsolariak abiatuko du saioa, 08:00etan.
-
Klasikoen Irakurketa Etenik Gabearen XVIII. edizioaren kartela
Bizenta Mogelen Ipuin Onak izango da Bilbo Zaharra Euskaltegiak antolatzen duen Klasikoen Irakurketa Etenik Gabearen XVIII. edizioaren irakurgaia, ostegunean, 08:00etatik 14:00etara. Eitb.eus-ek zuzenean eskainiko du irakurraldia.
Arriaga Bilboko antzokian, 400 lagunek (200ek baino gehiagok Arriagan bertan) elkarren segidan irakurriko dute emakume batek euskaraz argitaratu zuen lehen liburua, Esoporen 50 alegia eta Joan Antonio Mogel idazle eta Bizentaren osabaren beste zortzi biltzen dituen 1804ko lana.
IRAKURRI GEHIAGO BIZENTA MOGELI ETA "IPUIN ONAK"I BURUZ
Bizenta Mogel, "zigor zaurigarriaren beldur" izan ez zen idazlea
Osteguneko ekitaldian Nerea Ibarzabal bertsolari eta idazlea (Zumarraga, 1994) izango da lehena Bizenta Mogeli ahotsa ematen, 08:00etan. Bizenta bezala, markinarra da Ibarzabal, Bizkaiko bertsolari txapelduna eta Bar Gloria liburuaren idazlea.
Ondoren, 200 pertsona baino gehiago txandaka arituko dira irakurtzen, goiz osoan zehar, eta Euskal Etxeetako eta ikastetxeetako ordezkarien bideo pasarteak ere ikusi ahalko dira. Arriaga plazan, pantaila erraldoi bat jarriko da, eta eitb.eus-en ere jarraitu ahalko da.
Lehenago, ekainaren 3an, Mariasun Landak Bizenta Mogeli buruzko hitzaldia egingo du (19:00, Euskaltzaindiaren Bilboko egoitzan); eta ekainaren 4an (19:00, Euskaltzaindiaren Bilboko egoitza), bertso saio literarioa egingo dute Nerea Ibarzabalek, Uxue Alberdik eta Miren Amurizak, Miren Agur Meabe gai-jartzaile izango dela.
Ekimenaren aurreko edizioetan, liburu hauek irakurri dituzte: Axularren Gero, J.A. Mogelen Peru Abarca, Jon Miranderen Haur besoetakoa, Saizarbitoriaren Hamaika pauso, Arantxa Urretabizkaiaren Zergatik panpox, Bernardo Atxagaren Obabakoak, Gabriel Arestiren Harri eta herri, Sarrionandiaren Narrazio Guztiak, Franz Kafkaren Metamorfosia, Itxaro Bordaren %100 Basque, Txomin Agirreren Kresala, Anjel Lertxundiren Otto Pette, Mariasun Landaren Ipuin hautatuak, Bernat Etxepareren Linguae Vasconum Primitiae, Ramon Saizarbitoriaren Martutene, Miren Agur Meaberen Kristalezko begi bat eta Kirmen Uriberen Bilbao-New York-Bilbao.
