Kordobaren helegitea onartu dute, 2016ko kultur hiriburuaren auzian

Espainiako Kultura Ministerioak Donostia 2016ko kultur hiriburu izendatzeko erabakia hartu zuen, eta horren aurkako helegitea aurkeztu zuen Kordobak. Orain, Auzitegi Gorenak Kordobako Udalaren helegitea onartu du. Epaiketaren autoan aitortzen denez, 2012ko martxoaren 5ean jarri zuten errekurtsoa onartu du Gorenak.

Donostiako Udalak, bestalde, errekurtsoa jarri zuen Kordobaren helegitearen aurka, eta orain bertan behera utzi dute: prozesu-kostuak ordaindu beharko ditu Donostiako Udalak, 600 euro inguru. Gorenaren ustez, Espainiako justizia ardura daiteke prozesuaz (Donostia horren aurkakoa zen), eta Madrilgo epaitegiak aztertuko du, beraz, Kordobako Udalak defendatzen duen legez, irregulartasunik izan den.

Juan Karlos Izagirre Donostiako alkateak "lasaitasuna" helarazi du. Zerbitzu juridikoekin hitz egin ostean, honakoa esan du: "Prentsak argitaratu duenagatik, ez dago larritzeko motiborik".

"2016 deritzon proiektu handi horretan, anekdota bat baino ez da izango, Europa mailako proiektua baita", esan du. Izan ere, Europak "2016ko kultur hiriburua Donostia izango zela erabaki zuen, eta hori behin eta berriz berretsi dute", alkatearen ustez.