kultura
Dejabu Panpin Laborategia
XV. Donostia Antzerki Saria, 'Arrastoak' antzezlanarentzat
Erredakzioa
Dejabu Panpin Laborategiak aurkeztutako lana martxoaren 27an eskainiko da Victoria Eugenia Antzokian. Talde irabazleak 10.000 euro eta Iñigo Arregiren serigrafia bat jasoko ditu.
“Arrastoak” Dejabu Panpin Laborategia taldearen antzezlanak lortu du Donostiako Udaleko Euskara Zerbitzuak eta Donostia Kulturak antolaturiko XV. Donostia Antzerki Saria.
Talde irabazleak 10.000 euro eta Iñigo Arregiren serigrafia bat jasoko ditu. 8.000 euro orain eskuratuko ditu, eta gainerako 2.000 euroak jasotzeko, 2017. urtea bukatu aurretik euskarazko antzerki lan berri bat eskaini beharko du Donostian. Horrez gain, ikuskizun berri hori prestatzeko (proba saioak egiteko eta abar) bi aste egin ahal izango dituzte Harri Xuri Luhusoko produkziogunean, gastu guztiak ordainduta.
2014an Donostian helduentzako 15 antzerki lan eta 40 emanaldi eskaini dira eta guztira 5.854 ikusle izan dira emanaldi horietan.
“Arrastoak”, umorea eta drama
Donostia Antzerki Saria ematen duen epaimahaiaren esanetan “kolektiboko kideek ausardiaz eta sendotasunez heldu diote gaurkotasuna galtzen ez duten zenbait auzi garrantzitsuri, hauen artean nabarmenena nor garen eta nondik gatozen galderei erantzuten saiatzearena. Sormenez beteriko lana da, oso mamitsua. Maila metaforikoa erabiltzen dute oso modu bizian.”
Epaimahaikideen arabera, “gogoeta sorrarazten duen oso lan hunkigarria eta poetikoa da, publikoarengana zuzenean iristen dena”.
