Otaño omentzeko saioa eta 'Piano bat bertsotan', Hitzetik Hortzeran

Bertso jaialdia izan da Zizurkilen, Pello Mari Otañoren heriotzaren mendeurreneko ospakizunen barruan, Hernandorena Kultur Taldeak antolatuta. Xabier Amuriza eta Anjel Mari Peñagarikano gidari, eta Otañoren bertsoak abiapuntu jarrita, saio berezia bete dute Jon Maiak, Unai Iturriagak, Amaia Agirrek, Xabi Payak, Uxue Alberdik eta Amets Arzallusek. Intxaur pilotalekuan zale asko bildu da, baita Otañoren biloba bi ere propio Ameriketatik etorriak.

Zuri-beltzekoan ere Otaño protagonista. 1974an, Balendin Enbeitari egindako omenaldi saioan, Otañoren alaba zegoen publiko artean eta hari kantari jarri ziren bertsolariak. Joxe Luix Gorrotxategiren bertsoa apartatu dute atal horretarako. 1998an, berriz, Bertso Egunean antzerki musikatua egin zuten. Xabier Euzkitze Otañoren paperean jarrita, eta zinta horixe artxibotik berreskuratu dutena aste honetako zappingerako.

Azpeitian ere izan dira HHko kamerak Piano bat bertsotan ikuskizuna grabatzen. Iraurgi Saskibaloi Elkartearen taberna mukuru bete zuten zaleei paper mutur batean hitz bana idazteko eskatu zieten eta gero zakuan bildu zituzten paper zati guztiak. Aldioro zakutik hitzak atereaz moldatu behar izan zuten kantaldia Ainhoa Ansak eta Jagoba Astiazaranek, eta beste hainbeste egin zuen bertso jardunean Beñat Gaztelumendik.

Gainera 60ko hamarkadan Gotzon Elortzak ezkutuan filmatutako Erria dokumentala ere erakutsiko dute. Elortza Parisen bizi zen garai hartan eta klandestinoki errodatu zituen zenbait pelikula Euskal Herria gai hartuta. Errian Jon Enbeita, Balentin Enbeita eta Jon Lopategi bertsolariak ageri dira kantuan eta baserriko beharrean, baita Victor Olaeta dantzari eta koreografoa ere aurreskua dantzatzen.

Jasotako bideoen atalean Itziartik bidali dutena, Erromerixa egunean bertako bertso eskolako lagunek grabatua.

Urteko errepaso atalaren bigarren bilduma ikusi ahal izango da. Platoan bisitan izan direnak, elkarrizketatu dituztenak, HHrako bertsoak jarri dituztenak...

Hitzetik Hortzera, ostegun gauean 22:00etan ETB3n eta ostiralean 18:00ak aldera ETB1en. Zeuek gura duzuenean eitb.com-en.