Urgellek dio Euskadi ezin dela 'irla kultural bat izan'

Blanca Urgell Eusko Jaurlaritzako Kultura sailburuak adierazi du Euskadik "mundura" begira behar duela eta ezin dela "irla kultural bat izan". Kultura "guztiona" izan behar dela gaineratu du, eta denei tokia egin behar zaiela "benetan aberasgarria" izan dadin.

Radio Euskadiri eskainitako elkarrizketa batean, Urgellek esan du "guztiek" egiten dutela kultura, "bakoitzak duen ikuspegi eta logikatik" abiatuta, eta "guztiek" parte hartu behar dutela horretan.

"Kultura guztiona da. Ez da zertan bereizi behar euskal herritar izatea eta euskal kultura egitea, baizik eta denei egin behar zaie tokia benetan aberasgarria izan dadin", nabarmendu du.

Halaber, "topikotzat" jo du esatea egungo Eusko Jaurlaritzak "euskal nazioa minimizatu" nahi duela "Madrilera begiratzeko". "Zentzugabea da. Guk ez gaude Madrilera begira, mundura begira baizik. Hor dugu Etxepare Institutua, egun martxan jartzen ari garena. Gure ideia da Euskadik kanpora begira behar duela. Ezin daiteke irla kultural bat izan, euskal kulturaren parke tematiko baten antzekoa. Euskal herritar bezain munduko herritar izan behar gara", adierazi du.

Bere iritziz, hori guztia "adimena irekitzen eta ez ixten" lor daiteke. "Kultura-irla porrota dago. Munduari eman behar diogu eta mundutik jaso behar dugu", gaineratu du.

Euskal kultura existitzen dela esan du Urgellek, hau da, "euskal herritarrek kultura egiten dutenean sortzen dutena", eta "berezia eta balio handikoa" izatea egiten duten "berariazko ezaugarriak" dituela. Hala ere, "kulturaren homogeneotasuna baten antzekoa" saldu dela adierazi du, "errealitatearekin talka egiten duena". Izan ere, bere
ustez, errrealitatea da "herri honetako herritar bakoitzak modu ezberdinean bizi duela kultural". "Kultura bizitzeko modu guztiak dira baliozkoak eta aberasgarriak, eta batura hori da islatu nahi duguna", azpimarratu du.