Euskara, katalana eta galiziera sustatzeko konpromisoa hartu du Cervantes Institutuak

Kultura eta hizkuntza aniztasuna babesteko asmoz, Cervantes Institutuak, Institut Ramon Llullek, Consello da Cultura Galegak eta Etxepare Euskal Institutuak lau hizkuntzen arteko lankidetzarako lehen akordioa sinatu dute. Lau urterako elkarlana izango da, baina hitzarmena haratago luzatzeko prest agertu dira sinatzaileak.

Akordio horrek hainbat jarduera ahalbidetuko ditu, hala nola, liburuak itzultzea, azoketan batera parte hartzea, lau kulturen arteko elkarlana sustatzea eta jarraipen batzorde bat sortzea. Zehazki, lau erakundeen arteko lankidetza-maila eta egindako lanen eraginkortasuna aztertzea izango da batzorde horren eginkizun nagusia.

Bideokonferentziaz egindako ekitaldian, Luis Garcia Montero (Cervantes Institutua), Iolanda Batalle Prats (Institut Ramon Llull), Irene Larraza (Etxepare Euskal Institutua) eta Rosario Alvarez Blanco (Consello da Cultura Galega) aritu dira, eta hizkuntza-aniztasunaren alde onak nabarmendu dituzte bertan.

Hasieran Coruñan sinatu behar zen akordio horrek 2019ko ekainean Bartzelonako Ramon Llullen hasitako "elkar ulertze eta elkarrizketa lan bat sendotzeko" balio du, Garcia Monterok azaldu duenez.

"Munduan bakarka ibiltzeak ez du zentzurik", adierazi du Larrazak, eta akordioa sinatu duten arduradunek lau hizkuntza eta kultura horiek zabaltzeko eta orokortzeko egindako ahalegina nabarmendu du. "Misio honetan laguntzen diguten erakundeekin eta eragileekin lan egiten dugu, eta egokia da bidearen zati bat elkarrekin egitea", esan du.

Topaketa horretan, otsailaren 17an Cervantes Institutuak, Etxepare Institutuak eta Euskadiko Filmategiak sinatutako akordioa ere aipatu dute, Garcia Monterok zuzentzen duen erakundeak nazioartean dituen zentroen bidez euskal zinema zabaltzea baitu helburu.

"Euskal zinemak une oparoa bizi du. Gaur egun, Euskal Herrian zein kanpoan, gure historiako beste edozein garaitan baino askoz ere ekoizpen ezagun eta saridun gehiago daude", nabarmendu du Larrazak.

Horren harian, "hori ez da kasualitatearen ondorio", esan du Larrazak. "Kalitate bikaina erakusten duten filmak ekoizteko urte askoan egindako lanaren ondorio da, eta kanpoan harrera ikusgarria izaten ari dira", azaldu du.

Testuinguru horretan, Cervantes Institutuan proiektatuko diren filmak aukeratzeko bilerak bertan behera geratu dira pandemiaren eraginez, baina laster berriro ekingo diote lan horri, Etxepare Institutuko arduradunak gaineratu duenez.