kultura
Antzerkia
Bill Murray aktore estatubatuarra, Arriaga antzokian, ekainaren 19an
N. V. | EITB Media
"Ghostbusters" eta "Lost in translation" filmetako protagonistak "New Worlds" musika eta literatura uztartzen dituen ikuskizuna taularatuko du.
-
Bill Murray
Ekainaren 19an, Bill Murray estatubatuar aktore eta komiko ospetsua Arriaga Bilboko antzokian arituko da. Ghostbusters eta Lost in translation film ospetsuen protagonistak Jan Vogler biolontxelo-jotzailearekin batera sortu duen proiektua oholtzaratuko du, New Worlds.
"Musika, literatura eta poesia uztartzen dituen emanaldia da", antzokiko antolatzaileek azaldu dutenez, "zeina Bill Murrayk ingeles hutsean antzezten baitu, agertokian aipatu Jan Vogler, Mira Wang biolinista eta Vanessa Perez pianista lagun dituela". Emanaldia ingelesez da, eta euskarazko eta gaztelaniazko gainidatziak jarriko dituzte (aktoreak inprobisatutako ataletan izan ezik).
Sarrerak 36,50 eta 70 euro arteko prezioan daude salgai.
