'160 metros' dokumentala, oso-osorik azaroaren 16an Guggenheimen

Guggenheim Bilbao Museoak "160 metros: una historia del rock en Bizkaia" dokumentalaren emanaldi bat eskainiko du azaroaren 16an, 20:00etan, Zinebi Bilboko Dokumental eta Film Laburren Nazioarteko Zinemaldiaren 55. edizioaren programazioaren barruan, dokumentalaren arduradunek esandakoaren arabera. Museoak prentsa-ohar bidez zabaldu duenez, bost kapituluk osatzen dute Bizkaiko rockari buruzko dokumentala, eta horietatik hiru Interneten estreinatu dituzte jada.

1990eko hamarkadan Bilboko itsasadarraren bi aldeetan ekonomia eta gizarte alorretan izan ziren aldaketak kontatzen ditu dokumentalak rockaren ikuspegitik.

Alvaro Fierro musika kazetaria eta Joseba Gorordo errealizadorea dira dokumentalaren zuzendariak, eta ekoizleak Diego Urruchi eta Raul Lopez dira, Stereozona WebTV-ren eta Media Attack on line bideo agentziaren arduradunak, hurrenez hurren. Dokumentalean, besteak beste, talde hauek agertzen dira: Parabellum, Subversión X, Distorsion, Gris Perla, Los Clavos, Lord Sickness, El Inquilino Comunista, Cujo, Gringo, Ya Te Digo, Sonic Trash eta Quite Fantastic.

Historikoki aurrez aurre egon diren Bilboko itsasadarraren bi aldeak elkartu nahi ditu lanak, 1990eko hamarkadan zeuden musika ereduak elkartuz.