Zinema
GOYA SARIAK
'Handia' filmak Goya sarietarako 13 izendapen lortu ditu
eitb.eus
Pablo Berger zuzendari bilbotarraren 'Abracadabra' filma 8 ataletan izendatu dute eta Juanba Berasategiren 'Nur eta herenseguaren tenplua' animaziozko lanak film onenaren hautagaitza eskuratu du.
Aitor Arregik eta Jon Garañok Altzoko Handiaren bizitza oinarri hartuta egin duten Handia filmak 13 izendapen eskuratu ditu 2018ko Goya sarietarako, Espainiako Zinema Akademiak gaur goizean iragarri duenez. Handia ez da Goya sarietan lehiatuko den euskal lan bakarra izango. Pablo Berger zuzendari bilbotarraren Abracadabra filma 8 ataletan izendatu dute eta Juanba Berasategiren Nur eta herensegearen tenplua animaziozko lana, berriz, film onenaren saria jasotzeko hautagai izendatu dute. Fikzio lanak alde batera utzita, Felix Viscarret zuzendari iruindarraren Saura(s) lana dokumental onenaren kategorian aukeratu dute. Azkenik, Alberto Iglesias konpositore donostiarrak jatorrizko musika onenaren Goya sarietarako izendapena lortu du La cordillera filmerako egindako lanagatik.
Barbara Lennie eta David Verdaguer aktoreek jakinarazi dituzte 2018ko Goya sarietarako hautagaien izenak. Otsailaren 3an banatuko dituzte Goya sariak Madrilgo Marriott Auditorium hotelean.
Handia, besteak beste, film onenaren, zuzendari onenaren eta jatorrizko gidoi onenaren sariak irabazteko hautagaietako bat da. Gainera, Altzoko erraldoia hezurmamitu duen Eneko Sagardoy aktorea gizonezko aktore onenaren sarirako izendatu dute. Filmak EiTBren parte-hartzea du.
Guztira 13 hautagaitza eskuratu ditu Handia filmak atal hauetako Goya saria jasotzeko:
-Film onena
-Zuzendari onena
-Jatorrizko gidoi onena
-Gizonezko aktore berri onena (Eneko Sagardoy)
-Argazki zuzendaritza onena
-Produkzio zuzendaritza onena
-Musika onena
-Editatze onena
-Soinu onena
-Zuzendaritza artistiko onena
-Jantzi diseinu onena
-Makillaje eta ile-apainketa onenak
-Efektu berezi onenak
Kritikaren eta publikoaren onespena jaso duen Handia filmak Epaimahaiaren Sari Berezia irabazi zuen 2017ko Donostiako Zinemaldian.
13 zenbaki itsusia dela esaten dute askok… ba guri asko gustatzen zaigu!!! Trece nominaciones a los Goya!! #Goya2018
— Handia (@Handiafilm) 13 de diciembre de 2017
Ai ama… ai ama… ai ama… 13!!!!! #Goya2018
— Handia (@Handiafilm) 13 de diciembre de 2017
Abracadabra filmak zortzi izendapen lortu ditu
Pablo Berger zinemagile bilbotarrak zuzendariko Abracadabra filmak 2018ko Goya sarietarako 8 izendapen lortu ditu; tartean, jatorrizko gidoi onenarena, emakumezko aktore onenarena (Maribel Verdu) eta gizonezko aktore onenarena (Antonio De la Torre).
Pablo Berger, ETBri eskainitako elkarrizketa batean.
Guztira, zortzi sailetan izendatu dute:
-Jatorrizko gidoi onena
-Emakumezko aktore protagonista onena (Maribel Verdu)
-Gizonezko aktore protagonista onena (Antonio De la Torre)
-Antzeztaldeko gizonezko aktore onena (Jose Mota)
-Editatze onena
-Zuzendaritza artistiko onena
-Jantzi diseinu onena
-Makillaje eta ile-apainketa onenak
Nur eta herensugearen tenplua, animaziozko film onenaren sarirako izendatua
Juanba Berasategi zenaren azken filma, Nur eta herensugearen tenplua, animaziozko film onena jasotzeko hautagai izendatu dute. Handia lanaren kasuan bezala, EiTBren parte-hartzea duen filma da. Toti Martinez de Lezea idazlearen ipuin batean oinarrituta dago, Eneko Olasagastiren gidoia du, eta Joserra Senperenaren musika.
Animaziozko film onenaren #Goya2018 sarietarako hautatu gaituzte!! https://t.co/Ic1CIaLSD7 @PremiosGoya @EnekoOlasagasti
— Nur filma (@LoturaFilmsNur) 13 de diciembre de 2017
Saura(s) dokumentala, Dokumental onenaren Goya saria irabazteko hautagaia
Felix Viscarret zinegile iruindarraren Saura(s) lana Dokumental onenaren Goya saria irabazteko lehian izango da Cantabrico, los dominios del oso pardo, Dancing Beethoven eta Muchos hijos, un mono y un castillorekin batera.
Alberto Iglesias donostiarra, jatorrizko musika onenaren Goya sariaren lehian
Alberto Iglesias konpositore donostiarra jatorrizko musika onenaren Goya saria irabazteko hautagaietako bat da, Santiago Mitre zinegilearen La cordillera filmerako egindako musikarengatik.
