Itxi

Zinema

Zinema

'Las buenas compañías' filmatzen hasi dira, Itziar Ituño protagonista duen pelikula

I. R. | EITB MEDIA

Silvia Muntek zuzenduko du filma, eta 70-80ko hamarkadetan emakumeen eskubideen eta abortu duinaren alde borrokan aritu zen Errenteriako (Gipuzkoa) emakume talde baten istorioa kontatzen du. Eusko Jaurlaritzak finantzatu du lana, eta EITBren partaidetza du.

  • Pelikularen fotogrametako bat. Argazkia: Nico de Assas

    Pelikularen fotogrametako bat. Argazkia: Nico de Assas

EITBren partaidetza duen Las buenas compañias pelikula filmatzeko lanak hasi dituzte; Silvia Muntek zuzendutako lana da, Jorge Gil Munarrizekin batera idatzia, eta Itziar Ituño, Alicia Falco eta Elena Tarrats ditu protagonista.

Filma benetako gertaeretan oinarrituta dago eta Errenteriako (Gipuzkoa) emakume talde baten istorioa kontatzen du, 70-80ko hamarkadetan emakumeen eskubideen alde borrokatu zena. Taldeak, beharrezkoa zenean, haurdunak Frantziara eraman zituen abortu duin bat emateko.

Las buenas compañías Irusoin (La trinchera infinita), Oberon Media (Los Girasoles Silvestres) eta En la frontera película AIE konpainien ekoizpena da, Manny Films eta La Fidèle Production enpresekin batera ekoiztutakoa. Sei astez filmatuko dute Donostian, Errenterian eta Biarritzen, eta ICAAk, ICECek eta Eusko Jaurlaritzak finantzatuko dute, EITBren, TV3ren eta RTVEren partaidetzarekin.

Filma 2023an estreinatuko dute zinema aretoetan.

Sinopsia

1976ko uda. Beak (Alicia Falcó) 16 urte ditu eta herrialdean zehar dabiltzan aldaketa aireekin bat egiten du; emakume talde batekin lan egiten du kausa feminista ikusarazteko eta abortatzeko eskubidea onar dadila lortzeko. Odolean sentitzen duen errebeldia bere barne mundua nahastuko dion ustekabeko sentimendu batekin nahastuko da. Hilabete hauetan zehar, Beak oso adiskidetasun berezia izango du Maiderrekin (Elena Tarrats), familia oneko neska nagusiago bat. Bere konpromiso politikoak eta Maiderrekin duen harremanak bere bizitzan mugarri izango den etapa bihurtuko dute uda hori.