Euskal Zinema Gala, gaur gauean, ETB1en eta eitb.eus-en

Gaur gauean, Euskal Zinema Gala eskainiko du EITBk, aurten ETB1en estreinakoz 22:30etik aurrera, eta eitb.eus-en ere jarraitu ahalko da, zuzenean, 19:30etik. Edizio honetan, pausu bat aurrera eman nahi izan du EITBk, eta Euskal Zinema Galaren antolatzaile eta ekoizle izango da. Aitziber Garmendiak eta Jon Plazaolak aurkeztuko dute eta, ekitaldi horretan banatuko dira aurtengo Zinemira Saria eta Euskal Gidoilarien Elkarteen Saria. IZARO musikariak ere parte hartuko du.

2022ko Zinemira saria Txema Areizaga elektrikarien buruak jasoko du, in memorian. Izan ere, Donostia Zinemaldiak eta EPE/APV eta IBAIA ekoizleen elkarteek euskal zinemaren nortasun, programa edo erakunde nabarmen baten ibilbideari ematen dioten ohorezko golardoa da Zinemira saria; eta, aurten, teknikarien kolektiboari omenaldia egitea erabaki dute, profesional anonimo horien lanik gabe euskal zinema ezinezkoa izango bailitzateke. Iaz hildako Txema Areizaga elektrikarien buruak pertsonalizatuko du kolektibo hori, eta Areizagaren senitartekoek jasoko dute golardoa, Joseba Usabiaga aktorearen eskutik.

Euskal Gidoilarien Elkarteen Sariari dagokionez, bederatzi euskal film luze izango dira saria lortzeko lehian.

Emozioz eta umorez betetako gala izango da, eta euskal zinemak duen indarraren eta aurrera egiteko grinaren isla. Euskal zinemaren emozioa gure etxeetara ekartzea izango du xede, batzen gaituzten emozioen pantaila izango baita EITB denboraldi honetan.

Euskal zinemari berariaz eskainitako saila da Zinemira, eta Donostia Zinemaldiak eta Eusko Jaurlaritzako Kultura Sailak antolatzen dute, besteak beste, EITBren babesarekin.

Twitch erretransmisioa Gaztean

Gazteak ere egingo du Euskal Zinema Galaren kontakizuna Twitch kanalean, Ibon Fernandezen eskutik. Horien guztien berri emateko, hainbat gonbidatu izango ditu Ibon Fernandezek, Tabakalerako 2deorekin egindako elkarlanean. 19:00etan hasiko da zuzenekoa eta, Gaizka Izagirre kazetari eta zinema adituarekin batera euskal pelikulen errepasoa egingo dute

Kepa Junkera Berpiztu dokumentalaren aurrestreinaldia, EITB Galan

Kepa Junkera trikitilari ezagunaren memoria eta lana berreskuratzeko Kepa Junkera Berpiztu film dokumentalaren aurrestreinaldia eskainiko du EITBk. Irailaren 21ean Donostiako Victoria Eugenia Antzokian egingo den EITB Galan izango da, 19:30ean. EITBren partaidetza du filmak eta, Fermin Aiok zuzenduta, Bilboko musikariaren ibilbidea bilduko du, 2018an iktus bat izan ondoren eten behar izan zuen ibilbide oparoa.