telebista
Emanaldi berezia
Bertso Eguna, gaur gauean ETB-1en eta eitb.com-en
A.A.
EITB
Arratsaldean Kursaal Jauregian egindako ekitaldia izango da ikusgai.
Bideoak (1)
Gaur Donostian ospatuko den Bertso Eguneko ekitaldi nagusia eskainiko dute ETB-1ek eta eitb.com-ek, 22:30etik aurrera. Kursaaleko areto nagusian hamabi bertsolari izango dira kantuan: Beñat Gaztelumendi, Etxahun Lekue, Jexux Mari Irazu, Ramuntxo Christy, Jon Maia, Ander Solozabal, Igor Elortza, Maialen Lujanbio, Jone Uria, Andoni Egaña, Eneko Lazkoz eta Uxue Alberdi. Bestalde, Iñaki Gurrutxagak eta Aitzol Barandianek bertso jarriak abestuko dituzte.
Bertso Egunaren 44. edizioak gonbidatu bereziak ere izango ditu. Batetik, Eneko Dorronsoro zinegilea. Xalbador artzainaren mintzoa dokumentala prestatzen ari da eta ariketa baterako gaia dokumentalerako bildutako materialarekin emango da. Bestetik, Haatik dantza konpainiako kideek Errimak oinetan ikuskizunaren zatitxo bat eskainiko dute.
Bi arreba izeneko ikuskizunarekin elkarlanean diharduten Xabier Lizaso piano jotzailea eta Andoni Egaña bertsolaria ez ezik, Markiñako Abarka antzerki taldeko kideak ere Kursaaleko oholtza gainean ikusiko ditugu.
