Ramon Zuriarrainen 'Miss Mundos' erakusketara bisita, 'EITB Kultura'n

Bilboko Arte Eder Museoan abiatuko dute aste honetako 'EITB Kultura' saioa, Ramon Zuriarrain artista donostiarraren 'Miss Mundos' erakusketa ezagutu asmoz. 78 artelan daude ikusgai, olioak eta baita Euskadin eta Kairon margotutako akuarelak.

Hurrengo protagonista Berako Joseba B. Lenoir musikaria izango da. Bakarkako bigarren lanarekin datorkigu, Instroak vol. 2. Bederatzi abestik osatzen dute eta gitarra soinuak ditu nagusi.

Datorren igandean Bilbon ospatuko den Dantzaren Nazioarteko Egunari ere erreparatuko diote. Flamenkoa, dantza garaikidea, hip-hopa eta dantza afrikarrak uztartuko dituzten koreografiak kalean ikusteko aukera izango da.

Amaitzeko, Vuela si puedes antzezlanaren berri emango dute. Teatro Paraiso Arabako konpainiaren eta Les Ateliers de la Colline belgikarraren arteko elkarlana da. Katrina urakanak  New Orleansen eragindako hondamendia hartu du oinarri. Pertsonen arteko harremanari buruzko istorioa kontatzen du.

'EITB Kultura' gaur dago ikusgai ETB-1en eta ETB-2n, eta ostiral gauetan ETB-3n.