telebista
Albistegiak
Ramon Jauregirekin elkarrizketa, 'ETB Hoy' saioan
A.H.
EITB
'Egun On Euskadi' albistegian, berriz, Hur Gorostiaga Seaskako presidentea elkarrizketatuko dute, Herri Urratsaren bezperan.
Gaurko 'ETB Hoy' saioan, Olaia Urtiagak Ramon Jauregi diputatu sozialista hartuko du eta egun-eguneko egoera politiko eta ekonomikoaz galdetuko dio. Horren aurretik, Vanessa Sanchezek Gorka Barrenetxea laguntza bidezko ugalketan aditua elkarrizketatuko du.
ETB2ko albistegiaren amaiera puntua, ordea, Adela Gonzalezek gidatutako egun eguneko gaien inguruko solasaldiak jarriko dio. Ostiral honetan, Eva Domaika (Cadena Ser), Jon Ordoñez (Berria), Juan Carlos de Julian (Onda Cero) eta Victor Goñi (Noticias de Navarra) kazetariak bilduko ditu saioak.
ETB2k, gainera, Eusko Legebiltzarreko Osoko Bilkurarekin bat egingo du zuzenean goizeko 09:30etik aurrera.
'Egun On Euskadi' ETB1en
ETB1eko 'Egun On Euskadi' albistegian, berriz, zuzeneko konexioa egingo dute Iparraldearekin, Senperen ospatzen den Herri Urrats ikastolaren festaren bezperan, eta Hur Gorostiaga Seaskako presidentearekin hitz egingo dute.
Saioaren ohiko solasaldian, Jaime Tapia, Mikel Serrano eta Iker Bizkarguenaga kolaboratzaileek gaurkotasuna hartuko dute hizpide.
