Oviedo-Eibar partida, zuzenean, ETBKn eta eitb.com-en

Oviedok eta Eibarrek jokatuko duten Bigarren B Mailako igoera faseko partida zuzenean izango da ikusgai ETBKn eta eitb.com-en gaur, 18:30etik aurrera. Xabier Anduezak eta Juanan Larrañagak egingo dute kontakizuna.

ETBKn zuzeneko beste emankizun bat izango da, 16:30ean, Suitzako Itzuliko 2. etapa, Quinto eta Crans-Montana artean. Fermin Aramendi eta Xabier Usabiaga izango dira berriemaile eta internet bidez ere jarraitu ahal izango da.

ETB1eri dagokionez, 13:00etan, Iñaxio Perurenak 303 kiloko harriarekin egingo duen errekor saiakera emango dute zuzenean Leitzatik. Koldo Aldalur izango da bertan.

17:00etan, ohi denez, 'ETB Kantxa' tartea zabalduko dute, Eibarko pilota jaialdia eskaintzeko.  Apezetxea-Barriola / Aritz Lasa-Pascual partidarekin hasiko da, Jaunarena-Ezkurdia 4 1/2ko San Fermin Torneoko neurketarekin izango du segida eta Olazabal-Larrinaga / Mendizabal III-Peñagarikano norgehiagokarekin amaituko da. Xabier Euzkitze, Joxan Tolosa eta Elena Azpeitia izango dira esatariak.

Perurenaren saiakera eta pilota emankizuna eitb.com-en ere eskainiko dira.

Igandeko kirol eskaintza hiru emanaldik osatuko dute: 12etan, ETB1en, aizkolarien Arabako Batzar Nagusia Saria; 12:30ean, ETBKn, afizionatuen zesta puntako Bizkaiko Herriarteko Txapelketako finalak, eta 21:00etan, Lekeitiko Ikurrinaren laburpena.