Azkoitiako pilota jaialdia zuzenean, ostegunean ETB1en eta eitb.com-en

Ostegun honetan, Euskal Telebistak goizeko 11:30etik aurrera bat egingo du Zarauzko Ikurrinarekin. Gipuzkoako ligako estropadak izango dira lehenengo, eta KAE-1 ligakoak izango dira ondoren ikusgai. Mikel Olazabalek eta Ibon Gaztañazpik egingo dute emanaldiaren gaineko kontakizuna eta Amane Ibañezek protagonistak elkarrizketatuko ditu.

Arratsaldean, Azkotiako pilota jaialdia eskainiko da zuzenean, 17:00etatik aurrera. Jardunaldiko lehenengo pilota partida, Olazabal I-Iza eta A. Lasa-Peñagarikano bikoteek jokatuko dute, eta jaialdiko partida nagusiak Olaizola II-Apraiz eta Irujo-Barriola jarriko ditu aurrez aurre. Xabier Euzkitzek, Joxan Tolosak eta Koldo Aldalurrek egingo dute partiden gaineko kontakizuna.

eitb.com-eko erabiltzaileek ere, bi kirol emanaldiak zuzenean jarraitzeko aukera izango dute streaming bidez.

Zaldi lasterketak

Donostiako zaldi lasterketen probak zuzenean jarraitu ahal izango dira ostegun arratsladean ETBKn. 17:15etik aurrera Donostiako hipodromoan jokatuko den Urrezko Kopa ikusi ahal izango da hain zuzen ere.