'Spiderman 3', armiarma 'beltza', gaur, ETB2n

Fantasia eta akzioa nahasten dituen superheroien Spiderman 3 filma gaur emitituko da, 22:15etik aurrera, ETB2n.

Marvel komiki enpresak sortutako pertsonaiaren hirugarren partean, Peter Parker (Tobey Maguire) lasaitasuna ezagutzen hasi da, lan egonkorra du, Mary Jane (Kirsten Durst) emakume ederrarekin ezkondu nahi du eta bakea da nagusi hirian. Lasaitasun hori, baina, hautsi egingo da, Peterrek erabiltzen duen trajea gorri eta urdin izatetik beltza izatera pasatutakoan. Horrek indartsuago egingo du, baina bere nortasunean ere aldaketak eragingo ditu, bere alde txarra azaleratuz. Traje honen ondorioz, Peterrek konfiantza irabaziko du, eta benetan maite duen jendea baztertzen hasiko da.

Armiarma-gizonak, Spidermanek, traje berriak ematen dion indarraren eta iraganean izan den pertsonaren artean aukeratu beharko du. Bitartean, hirian bakea kolokan jarriko duten bi etsai agertuko dira: Venom eta Hondarrezko Gizona.