Bateratzea eta sexuen arteko gerra, gaur, 'El Conquistador'en

"El Conquistador del Fin del Mundo" iritsi da azkenik bateratzearen unera eta Patagoniako inguru hotzera. Hemendik aurrera, abentura saioa igande gauetan izango da ikusgai, 22:15ean hasita. Eta Patxi Alonsok aurkezten duen "El Conquis 10" eztabaida-saioa, aldiz, larunbatetan emango da apirilaren 12tik aurrera.

Iguazun egindako lehiaketaren lehen zatia infernua izan da lehiakide eta kapitainentzat, hein handi batean. Beroa, hezetasuna, intsektuak, sugeak eta guaranien ohiturak atzean gelditu dira, ordea. Orain, hotza, elurra, ibai izoztuak, mendiak eta banakako borroka izango dute aurrean.

Neskak baino mutil gutxiago iritsi dira bateratzera: 9 neska eta 4 mutil, hain zuzen ere. Bikiek, gainera, lehiakide bakarra balira bezala jokatzeari utziko diote, eta banaka arituko dira nor baino nor geiago. Orain argitzeko dagoena da neskek indarrak batuko dituzten Eneko, Antuan, Ander eta Iñigo kanporatzeko, edo antzinako taldeen filosofiari jarraituta izendatuko dituzten duelura joango direnak.

Eta korapiloa gehiago korapilatzeko, Rebeka eta Eneko ditugu, bikote gisa jokatzen. Horrek benetan zailduko du lehiakideen arteko bizikidetza kanpamentuan.

Andeetako mendilerroan aurkituko duten lehendabiziko gauza jokoa izango da. Elurra izango dugu protagonista, lehiakideek zulo bat egin beharko dute izotzetan euren motxilak aurkitu ahal izateko, eta, ondoren, mendi aldapatsu bat igo beharko dute. Lehendabiziko iristen dena duelutik libre izango da. Azken postuan iristen dena, aldiz, zuzenean joango da duelura.

Beraz, igande honetan, iluntzeko "Eguraldia"ren ondoren, "El Conquistador del Fin del Mundo" saioaren bateratze garaiko lehen saioa ikusi ahal izango dugu. Eta hurrengo larunbatean, apirilaren 12an, Patxi Alonsok aurkeztutako "El Conquis 10" eztabaida-saioa iritsiko da gure pantailetara.