telebista
Gaur
Eibar-Lugo eta armaginen harrera, zuzenean, ETBn eta eitb.com-en
A.A.
EiTB
Italiako Giroko azken aurreko etapa eta Laboral Kutxa-Bartzelona Endesa Ligako final laurdenetako bigarren partida ere zuzenean.
Bideoak (1)
Eibar futbol taldea izango dugu protagonista Euskal Telebistaren kirol programazioaren barruan gaur. Ipuruan Lugoren aurka jokatuko duen partida zuzenean eskaintzeaz gain, ondoren eibartarrek futbol taldeari egingo dioten harrera ere zuzenean jarraitu ahal izango da.
19:00etan hasiko den neurketaren kontakizuna Naxari Altunak, Juanan Larrañagak eta Joseba Urkiolak egingo dute ETB1en eta eitb.com-en. Joseba Urkiolak, Txemi Galarragarekin batera, Eibarren egingo den festa handiaren berri emango du 21:00etatik aurrera ETBKn eta eitb.com-en.
Aurrez, 17:30ean hasita, 'Primerako armaginak' izeneko erreportajea izango da ikusgai ETB1en. Lehen Mailara igotzea lortu duen taldeak bizi duen une gozoa bildu du Joseba Urkiola kazetariak. Bide batez, armaginen ibilbidearen errepasoa egin du egungo eta garai bateko jokalariak elkarrizketatuz: Txema Añibarro, Urko Vera, Mikel Arruabarrena, Jota Peleteiro, Diego Rivas, Jon Errasti, Diego Jimenez, Xabi Irureta, Jose Manuel Luluaga, Bixente Oiarzabal, Oscar Artetxe, Jose Ignacio Garmendia eta Jon Altuna, besteak beste.
Erreportajeko protagonista izango dira baita ere Gaizka Garitano entrenatzailea, Alex Aranzabal presidentea, Manix Mandiola eta Jose Luis Mendilibar entrenatzaile ohiak, Axel Riaño Ipuruako speakerra, Josean Olabarria Eibar taldearen autobus gidaria, Fran Garagarza idazkari teknikoa eta Eskozia La Bravako zaleak.
Italiako Giroa eta saskibaloia
15:00ak baino lehen egingo du bat ETB1ek Italiako Giroko 20. etaparekin eta 21:15ean hasiko da Endesa Ligako final laurdenetako Laboral Kutxa- Bartzelona partida. Bi emanaldiak eitb.com-en ere eskainiko dira.
Azken aurreko etapa jokatuko dute txirrindulariek larunbatean. 167 kilometroko ibilbide menditsuari egin beharko diete aurre Zoncolan mendatera iritsi bitartean. Ohi denez, Fermin Aramendi eta Xabier Usabiaga izango dira esatariak.
Saskibaloi emanaldiko arduradunak, berriz, Xabier de la Fuente, Josean Aldalur eta Jokin Etxebarria izango dira. Gasteizko Buesa Arenan jokatuko da bi taldeen arteko bigarren kanporaketa.
Amaitzeko, Zaramagako pilota txapelketako finalaren berri emango dute Iñigo Aiestaranek eta Mikel Rafaelek 12:00etatik aurrera ETBKn.
