telebista
ETB1en
Berriatura joango da, gaur, 'Herri Txiki, Infernu Handi' saioa
A.A.
EiTB
Bizkaiko Lea Artibai bailaran dagoen herriko hainbat biztanle ezagutuko dituzte Zuhaitzek eta Pagadik.
Informazio gehiago (1)
Aste honetan Bizkaiko Berriatua herria bisitatuko dute Zuhaitz Gurrutxagak eta Mikel Pagadik, 'Herri Txiki, Infernu Handi' saioan. Berriatuko herrigunea kostaldetik urrun egon arren, itsasoarekin egiten du muga, eta horixe izango da, hain zuzen ere, Pagadiren erronka: Berriatuko kostara iristea. Bidean, hainbat lagun ezagutuko ditu: Balentin Laka, itsasoan urte askoan ibilitako marinela eta egun margolanak egiten dituen artista; bere bizitzaren gorabeherez hitz egingo dute bere tailerrean. Ondoren Inazio eta Krispin Gojenola anaia arotzen etxera joango da bisitan.
Kostalderako bidean, mendian barrena doala, Bonifazio oilagor ehiztariarekin eta bere txakurrekin elkartuko da. Ondoren Iñaki Plaza basozainarekin egingo du topo: Iñaki basoko arbolak neurtzen dabil eta Pagadik lan horretan lagunduko dio. Eta halako batean iritsiko da kostaldera; han olagarroak nola harrapatzen diren ikasiko du Pagadik.
Zuhaitz, berriz, herrian barrena dabilela, Begoña ezagutuko du, Begoña news, herriko gorabehera guztiak ezagutzen ditu Begoñak. Ondoren herriko dentistari egingo dio bisita. Arantxa eta Elbira ahizpa bikiek Berriatuko eliza erakutsiko diote eta pulpitoa zertarako erabiltzen zen azalduko diote.
Zesta puntarako tradizio handia dago Berriatuan, goi mailako puntistak eman ditu herriak, eta baita txapeldun handiak ere. Herriko pilotalekuan, Roberto Lekue puntista ohia ezagutuko du, eta ondoren herriko zesta punta eskolako umeek lezio magistrala emango diote Zuhaitzi.
Azken urteetan etorkin asko Berriatuara eta hiru etorkin gazte ezagutuko ditu: Senegalgo Seni, Portugalgo Tiago eta Ekuadorko Ariel. Herriko auto ofizialean ere ibiliko da, rally auto batean, eta azkenik, argazki kamara analogikoak erabiltzen dituen argazkilaria ezagutuko du Zuhaitzek: Joxe Mari Kareaga. Elkarrekin herriko argazkia atera eta ETBko eguraldira bidaliko dute.
'Herri Txiki, Infernu Handi' saioa gaur, 21:30ean, emango da ETB1en.
