telebista
15:00etatik aurrera
Bizkaiko Bertsolari Txapelketako finalera begira, 'Hitzetik Hortzera'n
A.A. | EiTB
Finalaurrekoetako bertsoaldi onenak errepasatuko dituzte eta finalisten iritziak ere bilduko dituzte.
Abenduaren 17an Bilboko Miribilla aretoan jokatuko da Bizkaiko Bertsolari Txapelketako final handia. Hiru finalaurreko jokatuta, honako zortzikote hau ariko da bertan: Jone Uria, Beñat Ugartetxea, Etxahun Lekue, Ibon Ajuriagojeaskoa, Miren Amuriza, Onintza Enbeita, Xabat Galletebeitia eta Nerea Ibarzabal. Final horri begira jarriko da 'Hitzetik Hortzera' gaur.
Markina-Xemeinen, Basaurin eta Larrabetzun jokatu ziren hiru finalaurrekoak. Horietan 18 bertsolari aritu ziren kantuan. Saio horietako bertsoaldi onenak eskainiko dituzte.
Finalaurrekoetako errepasoa egiteaz gain, zortzi finalisten hitzak ere bilduko dituzte. Txapelketan orain arte izandako sentsazioak eta finalera begira dauzkaten asmoak zein diren kontatuko digute.
Hori dena eta askoz gehiago gaur izango da ikusgai ETB1en eta eitb.eus-en, arratsaldeko 15:00etatik aurrera. Eta jarraian, ohi denez, EiTB Nahieran-en egongo da saioa.
saioa.
