On Zientzia bideo lehiaketaren lanik onenak, aste honetako 'Teknopolis'en

Zazpigarren urtez jarraian, On Zientzia bideo lehiaketaren sariak eman dituzte aste honetan. Zientzia-bideo bikainak ikusteko aukera izan zen Elhuyarrek eta Donostia International Physics Centerrek antolatutako ekimenean; eta aste honetako 'Teknopolis' saioan aurtengo sariketako lanik onenak erakutsiko dituzte, artelan txikiak.

Gainera, ideia on baten istorioa ere ezagutuko dute. Honela hasten da: 'Bazen behin Nafarroako Unibertsitate Publikoa eta energia berriztagarrien sektoreko enpresen arteko elkarlana'. Istoriotik harago, elkarlan horren emaitza da, neurri batean, Nafarroa mundu mailako potentzia dela berriztagarrien sektorean.

Berriztagarriez ari garela, energia iturri tradizionalenetako bat biomasa dela azalduko du 'Teknopolis'ek. Euskal Herrian gehien kontsumitzen den energia berriztagarria da eta etorkizun handia dauka gainera. Energia berriztagarri horren berri emango du saioak.

'Teknopolis' larunbatero izaten da ikusgai 13:30ean ETB1en, eta igandean, 10:00etan ETB2n.