'Menos es Más' bere ordu tartean audientzia buru, astelehenean

Asteleheneko 'Menos es Más' saioa audientzia buru izan zen ordutegi nagusian % 10,7ko audientzia zatiarekin. Turismoa Euskadin ardatz hartuta, Iñaki Elorzak eta Leire Argandoñak gidatutako erreportaje saioak turismoaren hazkuntzaren aldeko eta kontrako lekukotzak eta iritziak bildu zituen. Saioak 205.000 ikus-entzuleko audientzia metatua lortu zuen Euskadin eta eragin eremuan.

Asteburuko kirol emanaldiak

Igandean, Eusko Label Ligak jokatutako Petronor Banderaren emanaldia bere ordu tartean nagusi izan zen % 16,2ko audientzia zatiarekin. Emanaldiak, gainera, 107.000 ikus-entzuleko audientzia metatua lortu zuen Euskadin eta eragin eremuan. Emakumezkoen Eusko Tren Ligari dagokionez, zuzeneko emanaldiak % 9,3ko audientzia zatia eta 41.000 ikus-entzuleko audientzia metatua izan zituen.

Larunbatean eskainitako Getxoko Banderak ere audientzia datu onak lortu zituen: Eusko Label Ligak % 10,2ko kuota eta 113.000 ikus-entzule, eta Eusko Tren Ligak % 8,2ko kuota eta 75.000 ikus-entzule.

Larunbatean, orobat, Donostiako Klasikoa eskaini zuen ETB1ek, audientzia datu bikainak bereganatuz. Emanaldiak % 12,0ko audientzia zatia lortu zuen, iazkoak baino 2,6 puntu gehiago. Audientzia metatuari dagokionez, 129.000 ikus-entzulek bat egin zuten lasterketarekin Euskadin eta eragin eremuan.