'Kresala' saioa Antena de Oro sariarekin nabarmendu dute

ETBk astero Pedro Garcia Larraganek aurkeztuta eskaintzen duen 'Kresala' saioak Antena de Oro sari bat irabazi du. Espainiaiko Irrati eta Telebista Elkarteen Federazioak urtero banatzen dituen sariak dira Antena de Oro golardoak.

'Kresala' telebista autonomiko onenaren sailean gailendu dute. Sari banaketa Aranjuezeko Gran Casinon izango da larunbatez, azaroaren 5ean.

Aurtengo sarituen artean, Albert Castillon, Juan Ramon Lucas, Manolo Lama, Maria Casado, Carlos Sobera, Marta Reyero, Marta Robles eta Bertin Osborne aurkezleekin batera, Fernandez Vega Oftalmologia Institutua, Espainiako Saskibaloi Selekzioa, Luis Maria Anson kazetari eta idazlea, Radio Juventudeko ikasle ohiak eta Maria Dolores de Cospedal politikaria daude.

Sari hau ez da 'Kresala'k jasotzen duen lehena. 2010eko urrian Bilboko Portuko Agintaritzak eta Ontzi Kontsignatarioen eta Zamaketarien Elkarteak Euskal Telebistako saio hau nabarmendu zuen.

'Kresala' saioa 2010eko otsailean estreinatu zen. Itsasoari buruzko istorio eta berriak ditu ardatz; gure herriarekin zerikusia dutenak eta hemen jazotzen direnak, itsasorik gabe bizi ezin duten lagunen kontuak. Astearteetan ematen da ETB-1en eta igandeetan ETB-2n.

Santa Klara irlara bisitan, aste honetan

Astearte honetan Donostiako Santa Klara irla bisitatuko du 'Kresala'k. Horrez gain, autengo Kontxako Banderaren inguruko erreportajea eskainiko dute; Urdaibaiko arraunlariekin izango dira, estropada jarraitu zuten kazetariekin, kale giroan. Bide batez, XIX. mendetik estropadaren errepasoa ere egingo dute.

Munduaren bira belaontzian egin duen Galdakaoko bikotearekin ere egon dira. Azkenik, Ondarroako kaian gauez dagoen jardunari erreparatuko diote.

Ohi denez, surf tartea eta itsaspeko altxorren irudiak ere izango dituzte.

'Kresala' astertean dago ikusgai ETB-1en 23:20ean.