Jarraipen zabala azaroaren 20ko hauteskundeei EITBn, ostiraletik

Jarraipen zabala egingo diete EITBko irrati, telebista eta Internetek azaroaren 20ko hauteskunde kanpaina eta hauteskunde gauari, datorren ostiralean hasita. Eztabaidak, elkarrizketak, eguneroko informazioa, doako iragarkiak eta hauteskunde gaueko saio bereziak izango dira irrati eta telebistan. Horrez gain, EITBk Interneten web gune berezia izango du eduki eta jakingarri guztiekin.

Hartara, ETB-1 eta ETB-2 eta Euskadi Irratia, Radio Euskadi eta Radio Vitoria buru-belarri ariko dira kanpaina osoan eta baita hauteskunde egunean bertan ere. Eguneroko informazioa albistegietako tarte berezietan sartuko da, baina horrez gainera, elkarrizketak eta eztabaidak izango dira eta doako iragarkiak; hauteskunde gauean, berriz, saio bereziak, inkestak, botoen kalkuluak eta behin betiko emaitzak.

Doako tarteak emanaldi komertzialetan

Euskal Irrati Telebistak, legeak agindu legez, alderdien esku doako tarteak jartzen dituzte irratiko iragarkien formatuan, hogei eta hogeita hamar segundoko iraupenarekin, irrati eta telebista kanal arrunten ohiko emanaldi komertzialetan airera daitezen.

Eguneroko albistegietan jarraipena

Aurreko hauteskunde aldietan bezala, oraingoan ere EITBk tarte bereziak sortzeko asmoa dauka, bai telebistan, ETB-1 eta ETB-2n, bai irratietan, Radio Euskadi, Euskadi Irratia eta Radio Vitorian, kanpaina ofizialak dirauen denbora guztian eguneroko informazio-saioetan airera daitezen.

Halaber, kanpaina Nafarroako Foru Erkidegoan nola garatzen den ere transmitituko da.

Hauteskundeei buruzko informazioan informazio-gune nagusiei buruzko kronika ere egingo da, Biltzarrerako hauteskundeen eremu orokorrean (Madril, Katalunia, eta abar).

Elkarrizketak

EITBko albiste zerbitzuek euskal gizarte osoari alderdi bakoitzaren programaren barruan zehaztuta dauden punturik aipagarrienei buruzko informazio zuzena ematea izango dute helburu. Ahalik eta ikuspegi zabalena emateko asmoz, hauteskundeetara aurkezten diren alderdi eta koalizioen ordezkariei eginiko elkarrizketak eskainiko dituzte.

ETB-1en, 'Gaur Egun' iluntzeko albistegiaren ondoren emango dituzte elkarrizketak, eta ETB-2n 'Egun On Euskadi ' saioaren barruan. Irratietan, berriz, astelehenetik ostiralera Euskadi Irratian 'Faktoria'n eta Radio Euskadin 'Boulevard' irratsaioan; Radio Vitorian, berriz, 09:00etatik 10:00etara izango dira 'Plaza Nueva'n.

Bina eztabaida hedabide bakoitzean

Ikusleei alderdi politikoek hauteskundeetarako prestatu dituzten programen eta proposamenen zuzeneko kontrastea eskaintzeko helburuz, debate bi egingo dira hedabide bakoitzean. Debateok ETB-1en emango dira ordutegi nagusian eta Euskadi Irratian 'Goiz Kronika-Albiste Faktoria' saioan izango dira entzungai eztabaida hauek.

Era berean, ETB-2n debate-saio bi egingo dira ordutegi nagusian emateko. Radio Euskadirako beren-beregi bi eztabaida egingo dira azaroaren 11 eta 18an. Egun horietan egingo dira Radio Vitoriako eztabaidak, hautagai arabarrekin.

Hauteskunde gaua

Azaroaren 20ko hauteskunde gauean EITBk saio bereziak emango ditu taldeko hedabide bakoitzean. Euskal Telebistak saio bana eskainiko du ETB-1en eta ETB-2n, 20:00ak baino lehen hasita, eta hauteskundeetako informazioa tartekatuko dute gainerako albistegi eta igandeko kirol-saioekin batera. Euskadi Irratiak eta Radio Euskadik 19:45ean hasiko dute hauteskunde gaueko tarte berezia.

Euskal Telebistan zein irratietan alderdi politikoen iritziak jasoko dira, lehen egun horretan egin eta aireratu diren inkesten emaitzen inguruan, eta baita hauteskundeen emaitza zehatzei buruz ere, horiek ezagutzen joan ahala. Zuzeneko harreman bideak finkatuko dira alderdi politiko nagusien egoitzekin eta datuak biltzeko zentro nagusiarekin.

EITB iritzi-galdeketa baten diseinua lantzen ari da, FORTArekin. Ikerketa honek hauteskunde deialdi bakoitzean izan diren emaitzen aurrerapena eta hurbilpena egin nahiko luke eta arratseko 20:00etan aireratuko dituzte horren emaitzak.

eitb.com

Webgune berezia izango du eitb.com-ek, albisteen jarraipen estua eginez. Egunero, albisteak, bideoak eta EITB taldean egiten diren elkarrizketak (bai telebistan, baita irratietan ere) ikusgai izango dira. Gainera, inkesten emaitzak, infografiak eta aurreko hauteskundeetako emaitzak jarriko dituzte eskura.

Sare sozialetan, Twitterren batez ere, politikoek zer dioten ere jasoko dute eta hauteskunde egunean programak zuzenean emango dituzte eta emaitza guztiak eskainiko dituzte jakiten diren bezain laster.