Aitzol Atutxak aizkora utzi eta lantzak hartuko ditu bere lehen bileran, gaur gauean, "Conquis"en

"El Conquistador del Caribe" saioaren aurreko atalaren amaieran, Yocahu taldeko kideek probako txerriak baino odolustuago bukatu zuten. Elkarren segidako hirugarren jokoa galtzeak arriskuan jarri du taldea, eta abenturako asterik txarrena igarotzen ari da. Aitzol Atutxa aizkolaria da taldeko kapitain berria, eta enbor latza izaten ari du bere lehen eguna. Izan ere, abenturan egun bakarra daraman arren, badirudi 20 egunez egon dela dagoeneko lehian. Dena den, bizkaitarra da aizkorarik ez duen gorri bakarra, taldeko gainerako kideek Arantxari aizkorakadak ematen jarraitzen baitute, etxera itzuli den arren. Hori guztia gutxi balitz bezala, taldekide bat galdu dute; zenbait irristatze izan ondoren, Ferrari Yocahua Karibeko zirkuitotik atera eta Nafarroara iritsi da itzulipurdika. Duela zenbait astetik iragarritako abandonua zen, eta, azkenik, Ferretik nahita esan zion agur abenturari. Orain lantza zaparrada dute zain Yocahu taldeko kideek bileran.

Urkok tematuta jarraitzen du duelura joateko ametsarekin, eta, saioaren hasieratik egiten ari den bezala, bera izendatzeko eskatu die taldekide eta kapitainei. Kanpamentu oso txiroan inprimagailua eta elektrizitatea egongo balira, Urkok kartelak eta propaganda banatuko lituzke izendatuaren lepokoa eskatzeko. Ikusteko dago bere ametsa betetzen duten eta, behingoz, duelura joaterik duen.

Talde urdineko kideak kanpamentu aberatsean erroldatu dira; itsasontzian gaurik gehien igaro duen taldea da Corocoteena, eta jokorik gehien irabazi dituena: lau, guztira. Orain, Berriatuko oilarrari ongietorria eman diote; Seletak ezin izan du kapitain bezala abentura hobe hasi, eta aste honetan bi ardura baino ez ditu: taldekideen izenak ikastea eta haiekin adostea Yocahu taldeko zein kide bidaliko duten zuzenean duelura. Nor aukeratuko dute? Kanpamentu aberatsera iritsi ote da Urkok abiatutako kanpaina?

Atabey taldeko kideek beso-zabalik hartu dute Nakor. Zarauztarrak ezin hobeki ezagutzen du saioa, denetarik egin baitu "Conquis"en; koadrodun alkandora jantzi, Julian oharkabean harrapatu eta saioa aurkeztea baino ez zaio falta. Taldeak itxaropen handia dauka haren jakiturian, eta orain gauza bakarra falta da: Nahiak eta berak duelura nor bidaliko duten jakitea.

Aukeratuak bi Yocahuren aurkako duelu gogorra izango du aurretik. Nor edo nortzuk izango dira asteko kanporatuak? Gaur jakingo dugu, 14. atalean.

"El Conquistador del Caribe" astelehenetan izaten da ikusgai, 22:30ean, ETB2n, eitb.eus-en eta "El Conquis"en aplikazioan. Gainera, atal guztiak ikus daitezke EITB Nahieranen, saioaren eta EITB Nahieran appetan eta EITB Mediaren gainerako plataforma digitaletan.