Europa Ligaren finalari jarraipen berezia ETBn

Asteazken honetan, Euskal Telebistak jarraipen zabala egingo dio Athletic-ek jokatuko duen Europa Ligako finalari, 'Athletic Directo' saioaren bidez. Sei orduko berezia eskainiko dute ETB-2n, eta, ETBK Sat katean, berriz, San Mameseko jaia emango dute zuzenean. Internet bidez, eitb.com-en, egun guztian Bucarest-eko 'fan zone' deritzon gunean bilduko diren jarraitzaile zurigorrien jarraipena egingo dute zuzenean.

Igandetik, Athletic-en azken ordua biltzen duen 'Athletic Directo' tartea eskaintzen ari da ETBK Sat, Jose Ituartek aurkeztuta.

Programazio berezia, asteazkenean, ETB-2n

Asteazkenean, finalaren egunean, jarraipen zabala egingo dute ETB-2n: sei ordu inguru iraungo duen 'Athletic Directo' saioa emango dute. 'Euskadi Directo'ko lan-taldeak egingo du 13:30ean hasiko den saioa, Ainhoa Garciak aurkeztuta. Horrez gain, neurketaren aurretik eta ondoren eskainiko diren saioak kiroletako lan-taldeak landuko ditu, Jose Ituartek gidatuta. Egun guztian, gainera, albistegiak gertu-gertutik erreparatuko diote hitzordu handiari.

Klaudio Landak aurkezten duen 'Ni Más Ni Menos' saioa ere berezia izango da, finalari begiratuko diote, alegia. Hartara, 18:50ean, Bukaresteko igorri bereziekin egingo dute bat. Txemi Galarraga kazetaria izango du berri-emaile talde honek buru.

Egunean zehar, 'Euskadi Directo' saioko lan-taldeak, Bukaresten (Maria Esquisabel) eta Bilbon (Maitane Bastida, Javier Palacio, Diego Calleja, Marta Elvira eta Maria Jurado) bizi den giroaren berri emango du 'Ni Más Ni Menos' eta 'Athletic Directo' saioetan. Halaber, hainbat erreportaje eskainiko dituzte, talde zurigorriaren zaleek bizi duten une garrantzitsua islatuko dutenak. 

San Mameseko jaia, ETBK Sat-en

ETBK Sat katean, bien bitartean, San Mamesen ospatuko den jai handia eskainiko dute zuzenean. Mikel Ibargoienek eta Unai Ugartek kontatuko dute bertan jazotzen den guztia. Jaia, Oihan Vegak eta Iñigo Asensiok gidatuko dute. Musika taldeak ere izango dira zuzenean: Doctor Deseo eta The Uski's. Gainera, ETBK Sat-eko saioan, Bukarest-ekin bat egingo dute hango giroaren berri emateko, eta Europako Txapelketan Athletic-en ibilbidea aztertzen duten erreportajeak eskainiko dira.

Bukarest-en jarraitzaile zurigorrien gunea, zuzenean, eitb.com-en

Bukarest-eko 'fan zone'rekin bat egingo du egun guztian eitb.com-ek. Errumaniako hiriburuan Athletick-eko jarraitzaileak bilduko diren lekuan gertatzen dena eskainiko du zuzenean EITBko web guneak.