albistea
Hitzordu kulturala
Willis Drummond taldearen rocka 'EITB Kultura' saioan
M.A.
EITB
Gainera, "T-Festa, Art T-shirt Festival" ekimena eta Jon Maiaren Gazta zati bat dokumentala.
-
EITB Kultura.
Aste honetako 'EITB Kultura' saioan Willis Drummond bandaren hirugarren lanaren berri emango dute. Heletako laukoteak Instanteak diskoa aurkeztuko du atal honetan. Zortzi abestiz osatutako albuma da, rock estilo berezia jorratu dute eta oraingoan hitzei eta ahotsei eman diete garrantzia.
Bestalde, "T-Festa, Art T-shirt Festival" ekimenaren inguruan jardungo dute. Bilboaldeako artista talde baten egitasmoa da hau eta arte garaikidea disziplina-anitza dela erakustea dute helburu nagusi. Horretarako kamisetak aukeratu dituzte euskarri. Artista ugarik hartu du parte proiektuan eta bakoitzak niki bat diseinatu du gustukoen duen teknika erabilita. Lan hauekin erakusketa bat prestatu dute.
Horretaz gain, Jon Maiak Gazta zati bat ikus-entzunezko lana ekarriko du 'EITB Kultura' tartera. Bertsolariak zuzendu eta idatzi duen dokumentala Nazioen Munduan herri ekimenetik abiatutako lan hau etorkizunari baikor begira ari zaion kontakizuna da eta Euskal Herriko eta Eskoziako herritarrak ditu protagonista. Donostian, Giza Eskubideen X. Zinemaldian aurkeztu zuten egitasmoa.
'EITB Kultura' astelehen honetan emitituko da 00:10etik aurrera ETB-1en, asteartean 02:35ean ETB-2n eta ostegunean 22:30etik aurrera ETB-3n.
