Imanol, Mikel Laboa eta Xabier Leteren omenezko kantaldia ETB-1en

Imanol, Mikel Laboa, Xabier Lete eta gu kantatzen ikuskizuna eskainiko du ETB-1ek gaur gauean, 22:00etan. Bilboko Euskalduna Jauregian grabatu zen emanaldia pasa den ekainaren 3an.

Unai Zabaletak eta Kristina Urrutiak aurkeztutako ekitaldian hiru euskal abeslari handien kantuez gozatzeko parada izango da. Zazpi lagun arituko dira kantuan: Jaione Olazabal, Patxi Saiz, Niko Etxart, Kattalin Indaburu, Amaia Riouspeyrous, Alberto Zunzarren eta Patxi Mariezkurrena. Gainera, Sustrai Colina eta Aitor Mendiluze bertsolariek eta, Joseba Sagastibeltzak zuzenduta, Leitzako dantzariek ere parte hartuko dute.

Kontzertuan arituko diren musikariak Juantxo Zeberio (pianoa), Peio eta Xabi Brave eta Maider Cigaroa (soinua), Txema Garces (baxua), Jose Ramon Mitxelena (gitarra), Mikel Andueza (saxoa), Hasier Oleaga (bateria) eta Francisco Herrero (biolina) dira.