Gotzon Hermosillaren azken liburuari buruz, gaur, 'Arte[faktua]'n

Gotzon Hermosilla elkarrizketatu du aste honetako 'Arte[faktua]' saioak. Azaldu duenez, gau giroko istorioak idazteko joera du modu inkontzientean, eta halakoxeak omen dira argitara eman berri duen Gaur galtzea tokatzen da liburuko narrazio batzuk.

Ondo ezagutzen dituen lekuak eta jende mota ageri dira Hermosillaren ipuin laburretan. Bilbo eta Barakaldoko auzo txiro, ilunak; gauez taberna zuloan elkartzen diren pertsonaia marjinalak... Galiziak eta bertatik Bizkaira etorritako migranteek ere leku handi samarra dute Hermosillaren liburu berrian.

Soziologian eta Zientzia Politikoetan lizentziaduna da Gotzon Hermosilla, eta Alfabetatze Euskalduntze Koordinakundeko (AEK) komunikazio arduraduna izan zen aldi batean. Gaur egun Berria egunkariko kazetaria da eta Radio Euskadiko kolaboratzailea 'La Jungla Sonora' musika saioan.

Iñigo Astiz etorriko da 'Arte[faktua]'ra Gotzon Hermosillak gonbidatuta. Poeta eta idazlea da Astiz eta Hermosillarekin batera egiten du lan Berria-ren Bilboko ordezkaritzan. Iaz Rikardo Arregi kazetaritza saria irabazi zuen Iñigo Astizek Kixotenean liburuarekin.

Irakurlearen atalean, Bilboko DDT liburu-dendako Andoni Azkaraik berak idatzitako Mierda de Bizkaia y sus grupos punk maketeros liburua gomendatuko digu.

Galdetegia sailean, berriz, gehien hunkitu duen liburua zein izan den argituko du Rafa Ugaldek; eta Maite Darcelesek, bere aldetik, azalduko du oraindik euskaraz ez dagoen zein liburu itzuli beharko litzatekeen. Eneko Bidegainek zein libururen idazle izan nahiko lukeen esango du.

Belatz komikigile nafarrak, Apalategia izeneko tartean kontatuko du zein liburu ari den irakurtzen, zein liburu klasiko ez duen lortu osorik irakurtzea eta zein izan den oparitu duen azken liburua.

Aritz Brantonek Eider Rodriguezen Urtebetetze festa liburuaren booktubea eskainiko digu.

Literaturari buruzko 'Arte[faktua]' saioa larunbatetan izaten da ikusgai, 15:00etan, eitb.eus-en eta ETB1en.