Vetusta Morla taldea, gaur gauean, 'EiTB Kultura' saioan

Vetusta Morla pop rock talde ezaguneko kideekin izango da aste honetako 'EiTB Kultura Transit' saioa, BECean emango duten kontzertuaren bezperan. La deriva diskoaren aurkezpen biran murgilduta, azken lan honen nondik norakoak azalduko dituzte. Horrez gain, Delirium Studios ekoizpen etxe euskaldunarekin batera egingo duten 'Los ríos de Alice' bideokliparen inguruan arituko dira.

Datorren asterako aurreikusita dauden kontzertuen artean, Seiurte taldeak Ezpalak diskoaren aurkezpen birari hasiera emateko Tolosan eskainiko duen emanaldiari erreparatuko diote.

Zine kontuei dagokionez, aste honetan estreinatuko den Pos eso animazio filma hartuko dute hizpide. ETBren parte hartzea duen filmak arrakasta handia izan du nazioarteko zine jaialdietan. 'EiTB Kultura' saioa Carlos Juarez produktorearekin arituko da solasean, eta filmaren bikoizketan parte hartu zuten Marivi Bilbao eta Alex Angulo aktoreak gogoratuko dituzte.

'EiTB Kultura Transit' gaur gauean emitituko da ETB1en eta ETB2n.