Erremontari
APIRILAK 28-EKAINAK 16
Astelehenean hasiko da "Erremontari" saioko bosgarren ekitaldia
EITB MEDIA
Bost bikote lehiatuko dira Sagardoaren Txapelketako txapela lortzeko apirilaren 28tik ekainaren 16ra eta Javi Urrizaren azken lehiaketa izango da. Partidak astelehenetan jokatuko dira berriro, eta ETB1en eta eitb.eus-en ikusi ahal izango dira.
Sagardoaren Txapelketaren barruan garatzen den "Erremontari" programaren bosgarren edizioa astelehen honetan, apirilaren 28an, hasiko da, eta ekainaren 16ra arte iraungo du, egun horretan jokatuko baita finala.
Aurtengo txapelketa bost bikotek osatuko dute, eta guztien arteko ligaxka bat jokatuko dute bost jardunalditan, apirilaren 28a eta maiatzaren 26a bitartean.
Ligaxkako fasea amaitutakoan, lehenengo postuan sailkatutako bikoteak zuzenean egingo du jauzi finalera; bigarren sailkatuak, berriz, finalerdietara (ekainak 9) igaroko dira, eta aurkariaren zain geratu. Aurkaria aurretik (ekainak 2) jokatuko den play-off batetik aterako da. Aipatu play-offean aurrez aurre izango dira ligaxka fasea hirugarren eta laugarren postuetan amaitzen duten bikoteak.
Aurten ere kapitainen figura egongo da, eta Iñaki Lekuona, Patri Espinar, Igor Arruti eta Aritz Artadill eta Gorka Izagirre txirrindulari ohia (aurtengo nobedadea) arituko dira zeregin horretan. Bestalde, eta aurreko edizioetan bezala, bikote bakoitzak sagardotegi baten izena hartuko du: Oialume Zar, Aburuza, Bereziartua, Alorrenea eta Petritegi.
Partidak Hernaniko Galarretan jokatuko dira, eta lehiaketa astelehenean hasiko da, honako norgehiagoka hauekin: Urriza-Larrañaga vs Aldabe-Barrenetxea IV eta Segurola-Azpiroz vs Ezkurra II-Juanenea. Txapelketa, urtero bezala, ETB1en eta eitb.eus-en jarraitu ahal izango da.
Hauek dira aurtengo txapelketan parte hartuko duten bikoteak eta horien kapitainak:
OIALUME ZAR
Kapitaina: Iñaki Lekuona
Erremontistak: Kemen Aldabe eta Endika Barrenetxea (Barrenetxea IV)
ABURUZA
Kapitaina: Gorka Izagirre
Erremontistak: Imanol Ansa eta Aritz Zubiri
BEREZIARTUA
Kapitaina: Patri Espinar
Erremontistak: Josetxo Ezkurra eta Aritz Juanenea
ALORRENEA
Kapitaina: Igor Arruti
Erremontistak: Beñat Segurola eta Xabier Azpiroz
PETRITEGI
Kapitaina: Aritz Altadill
Erremontistak: Javier Urriza eta Iban Larrañaga
