Kontzertua ere eskainiko dute 'Go!azen'eko aktoreek larunbatean

Larunbat honetako (urriak 12) EiTB Jaiaren barruan kontzertua emango dute 'Go!azen'eko aktoreek ere. Hiru3 Jaiko oholtzan eskainiko dute, telesailaren lehen atalaren aurrestreinaldia egin aurretik, eta kontzertu hori ikusteko ez da sarrerarik beharko.

15:30ean irtengo dira Hiru3 Jaiko oholtzara ETBko aktore gazteak. Aurretik, Ene Kantak eta Kantu Kolore taldeen emanaldiak izango dira oholtza horretan bertan. 'Go!azen'eko aurpegi berriek telesailak ezagutzera eman dituzten kantetako batzuk abestu eta dantzatuko dituzte oholtza gainean, aurtengo udan ezagun egin den 'Zatoz gurekin', besteak beste, eta baita gaztetxoek aspalditik ezagutzen dituzten 'Mugimenduan tinko', 'Denok zu' edota 'Go!azen' abestiak ere.

Kontzertu hori amaitutakoan zabalduko dira lehen atalaren aurrestreinaldia egingo den aretoko ateak. Aurrestreinaldi horretarako bai beharko dira sarrerak. Eskuratu nahi badituzue, hartu parte zozketan.