Sor Paresi, Inesi laguntzeko prest, gaurko 'Goenkale'n

Inesek bere semea Ernestorengandik urrundu nahiko du 'Goenkale'ren gaur gaueko atalean, eta horretarako sor Paresiri eskatuko dio laguntza.

Moja izan zen garaia ekarriko du gogora Inesek. Germanek eta biek bat hartuko dute, Ernestori haurrarengana hurbiltzen ez uzteko. Sor Paresi preso dago ume lapurtuen auziagatik, eta hari laguntza eskatzea otuko zaio Inesi. Ernesto erabat ahulduta utziko du sor Paresik Inesi emango dion laguntzak.

Etxegaraitarren etxean, Arantzak Paskal nebarekin egin du amets, eta amari kontatuko dio. Amaliak, ordea, ongi daki semeak Balin nolako bizimodua duen, eta hari laguntzen jarraituko du, isilpean bada ere.

Izaskunek, berriz, lanik gabe denbora asko eman duen beldur izango da, eta botikak antolatzea ez zaio erraza egingo. Hala ere, bezeroekin esku ona duela erakutsiko du.

Axunek, berriz, antzera jarraituko du. Xantaia emozionala egingo die Sabinori eta Luperi, eta berarekin bizitzen jartzea lortuko du azkenean.

Gaur gauean egongo da ikusgai 'Goenkale'.