"Goenkale"ko lantaldearen agurra zuzenean, gaur goizean, eitb.eus-en

"Goenkale" telesaila grabatzeko lanak amaitu dituzte jada, eta lantaldeak, agur gisa, agerraldia egingo du gaur, Miramongo estudioetan, Donostian. 11:30ean hasita, Boga tabernan izango da ekitaldia, eta zuzen-zuzenean emango dugu, streaming bidez, eitb.eus atarian. Agerraldiaz gain, Ugaitz Alegria aktoreak lankide izan zituenei egindako elkarrizketak ere izango ditugu ikusgai.

Arraldeko taberna ezagunenean izango da topaketa. 21 urteko ibilbide luzea abenduan amaituko du telesailak, baina, agur gisa, gaur elkartuko dira bide luze honetan ibili diren pertsona guztien ordezkariak: ETBren eta Pausoka ekoiztetxearen arduradunak, aktoreak eta teknikariak. Orotara, 60 bat lagun bilduko dira bertan.

Familia argazkia eginez hasiko da ekitaldia. Ondoren, 'Goenkale'ren ibilbidearen inguruko nondik norakoei buruz mintzatuko dira, eta mokadutxo bat jango dute bertan bildutakoek. Ugaitz Alegria ETBko telesail beterano honetako aktore izan zen orain denboraldi batzuk, eta lankide izan zituenekin berriketan arituko da eitb.eus-en kameren aurrean.

Esan bezala, "Goenkale" telesaileko lantaldearen agurra zuzenean jarraitu ahal izango duzue, gaur, 11:30ean hasita.