Gu Ta Gutarrak
22:25ean
Erratzuko final handia, gaur gauean, 'Gutarrak Kanpinean'
EITB
Talde urdinaren eta arrosaren arteko erronka gogorra izango da saioaren azkeneko atalean.
Nafarroan jarraitzen dute 'Gutarrak Kanpinean' saioko kideek, eta gaur gauean, Erratzuko kanpinean jokatuko dute final handia. Arrosak ala urdinak, zein taldek irabaziko du jokoan dagoen bidaia?
Aste honetan, Beitia, Leire eta Imanol izango dira talde arrosan, eta Eneko, Enara eta Iker, urdinean. Final handia denez, lehenengo erronkak ere puntuatuko du; beraz, oso adi ibili beharko dira lehiakideak lehenengo momentutik. Besteak beste, behi bat jetzi beharko dute. Final handia Erratzuko plazan jokatuko den errelebo ginkana bat izango da, eta emozioa azken unera arte mantenduko da.
Azken saio honetan, gainera, gutarrek trapu zikin guztiak aterako dituzte, eta ez da gutar bakar bat ere libratuko. Bestalde, Gutar Buru Batzarrak 'Gutarrak Kanpin'eko kanpinlaririk jatorrena izendatuko du.
Urdinek bi puntu igo zituzten markagailura aurreko astean. Oraingoz, sailkapena 5 eta 3 dago arrosen alde, baina sorpresa galanta har dezakete.
'Gutarrak Kanpinean' gaur, astelehena, izango da ikusgai, 22:25etik aurrera, ETB1en.
