Edu Barinaga izango da gaurko gonbidatua 'Gure Kasa' saioan

Gaur gauean, Euskal Telebistan oso garrantzitsua den gonbidatu bat etorriko da 'Gure Kasa'ra: Edu Barinaga, ETBko zuzendaria. 2014tik dago zuzendari postuan, eta Baleuko ekoiztetxeko kudeatzailea izan da lehenago. Animazioan, zineman eta telebistan proiektu askotan egin du lan Barinagak. Besteak beste, lan horiei buruz, zuzendari postuaz eta Euskal Telebistak egun duen egoeraz jardungo dute saioan. Barinagak egin dituen programen errepasoa egingo dute saioan, baita zineman, dokumentalgintzan eta komunikabideetan egindako lanena ere.  

Horrez gain, Edu modu pertsonalagoan ezagutzeko aukera izango dugu. Marta Elvirak Potilleoa egin du, eta, horretarako, Barinagaren gertukoekin izan da Durangon eta Bilbon. Bestalde, Joseba Belokik bizikleta txango bat egin du Barinagarekin, gonbidatua sakonago ezagutzeko. Saioa bukatzeko, Izaskun Moyanok oroitzapen guztiak kaxa batean bildu ditu, Barinagaren gertuko familiaren laguntzaz. 

'Gure Kasa' 21:00etan izaten da ikusgai, ETB1en eta eitb.eus-en, astelehenetik ostegunera.