Hizka Mizka
Errekorra
Ioritz Berrak agur esan du 'Hizkamizka'n 17.600 euro irabaziz
A.E.
EiTB
60 saiotan hutsik egin gabe aritu da lehiaketan.
Informazio gehiago (1)
Ioritz Berra lehiakideak 'Hizkamizka' lehiaketa utzi du gaur. Azkenean, 17.600 euroko zakua irabazi du eta 60 saio egin ditu 'Hizkamizka'n hutsik egin gabe. Berak eskuratu du, hain zuzen ere, Zuhaitz Gurrutxagak aurkezten duen programaren errekorra. Ostiraleko saioan, Orioko Iker Gurrutxaga izan du aurkaria, bera garaitzea lortu duen lehiakidea.
Ioritz Berrak orain arteko marka guztiak hondu ditu ETB1eko eguneroko lehiaketan. Bera izan da denborarik gehien egon dena saioan kale egin gabe eta, ondorioz, diru kopururik handiena eskuratu duena. Ioritz Berra donostiarra da, nekazari ingeniari teknikoa. IGA edo irakasleen prestakuntzako masterra egiten ari da, irakasle izateko, frantsesa ikasten eta euskarako 4. perfilerako prestatzen, halaber. Lanbidez elikagaien auditore da, baina langabezian da egun. Lehen aldia da lehiaketa batean parte hartzen duela, eta agerian da bikain ekin diola.
'Hizkamizka', eguneroko saioa
Ioritz Berraren urratsak jarraitu nahi dituenak oraindik badauka aukera. 'Hizkamizka' saioan lehiakide izateko hizkamizka@eitb.com helbide elektronikora idatzi behar da. E-posta horretan parte hartu nahi duen pertsonaren datu guztiak zehaztu behar dira: izen-abizenak, adina, helbidea, herria, e-posta helbidea eta kontakturako telefono bat. Argazkia bidaltzea ere eskertuko da.
ETB1eko saio honetan 300 euro daude jokoan egunero. Bi lehiakidek hartzen dute parte saio bakoitzean eta, erantzun zuzen gehien emanez, puntu gehien lortzen duenak egiten du aurrera; hau da, hurrengo saioan parte hartzeko aukera du.
Galdera erantzunen saioa da 'Hizkamizka'. Trivial jokoan bezala, gai eta mota guztietako galderak egiten dizkie Zuhaitz Gurrutxagak lehiakideei, eta horietako batzuetan pista batzuk ere izaten dituzte.
Ehun saio bete berri ditu 'Hizkamizka'k. Ehungarren saioren atarian, Zuhaitz Gurrutxaga aurkezleak 10.000 galdera egin dizkie bertatik pasa diren lehiakideei, 100 parte hartzaile hain zuzen ere. "Giro ona nabarmedu du programako lan-taldeak: lehiakidek gustura egon ohi dira gurekin eta gu ere bai eurekin". Gizon gehiagok hartu du parte emakumeak baino. Gipuzkoatik etorri dira gehienak, ondoren bizkaitarrak, arabarrak, nafarrak eta Iparraldetik ere izan da lehiakide bat.
'Hizkamizka' 13:30etan dago ikusgai, astelehenetik ostiralera, ETB1en.
