Irrikitown
Arrakasta itzela
Ia 100.000 lagunek egin zuten bat 'Irrikitown'en lehen atalarekin
Erredakzioa
Twitterren ere joera (TT) izan zen euskal tuiterlarien artean, umap.eu atariaren arabera.
Informazio gehiago (1)
Arrakasta itzela izan zuen atzo Irrikitown saioak bere estreinaldian. Ia 100.000 lagunek egin zuten bat ETB-1eko umore-saio berriarekin uneren batean. Eta Twitterren ere joera izatea lortu zuen euskal tuiterlarien artean, umap.eu atariaren arabera.
Lehenengo saioan oihartzun handia izan zuen ETB-1eko umore-saio berriak. Telebistako audientzia datuen arabera, euskaldunen artean %8,4ko datua eman zuen eta 97.000 ikus-entzuleko audientzia metatua.
Twitterren, berriz, guztira 310 txio bota ziren atzo #irrikitown traolarekin eta euskal tuiterlarien artean joera (TT) izatera ere iritsi zen, umap.eu atariak dioenez. Umap.eu-k twitterlari euskaldunen jarduna jaso eta filtratzen du eta Twitterren euskaraz aritzen direnen artean, zer izan den joera kalkulatzen du. Horren arabera, #irrikitown azken 24 orduetako joeretako bat izan da, besteak beste, #keinubat eta #ZorionakAma traolak bezala.
Orokorrean, ikus-entzuleei saioa gustatu zitzaien botatako mezuen arabera. Adibide batzuk jartzearren, @UxuRealsociedad-en iritziz, "Etbk aspaldixen eukidauen programaik onenetaikua" da, eta @itxajuaris-ek esan zuenez, "Ze haundixek dien, benetan, barrez lehertzen nabil! ITZEL!".
PP-ko bertsolariaren esketxa izan zen tuiterlarien artean gustukoenetako bat. @Caroliiina9-k, ¿@elgateteasesino-k, @anderbarroso7-k, @haizea_28-k eta beste hainbatek barre ederrak egin zituzten euren mezuetan esan zutenez.
Andoni Agirregomezkortak egindako Chicoteren imitazioa, Kortaren GPSarena eta Lekeitioko antzarren egunaren parodiak ere izan zituzten iritziak Twitterren. @iraultxo-k, adibidez, "Enorme!!!antzar euna bankeruekin #irrikitown" idatzi zuen eta @ander15irujo-k berriz, "#irrikitown chicoteeeeee batzokiiin jajajajjajaajajjajaj"
Baina kritikaren bat ere izan zuen saioak. @Markelastorkiaren hitzetan, adibidez, "#irrikitown zaleen desberdintasunena oso txarra.. Realekuak olakuak gerala? Gainera hurrengo urtian griezmann ta vela realian egongo dia!"
Atzerritik ere ikusi zuten hainbat jarraitzailek; izan ere, eitb.com-en zuzenean ikusi zitekeen streaming bidez, ETBn emititzen zuten bitartean.
Eta une horretan ikusterik izan ez zutenentzat, 'Irrikitown' EITB nahieranen ere badago ikusgai, edozein momentutan ikusi ahal izateko.
