Mari Jaia eta 'dida' irratsaioko Jon Gotzon, 'Irrikitown' saioan

'Irrikitown' umore saioak pertsonaia berriak aurkeztuko dizkigu gaur gauean, 22:15ean, ETB1en. Mari Jaia izango dugu batetik, eta, gainera, Gaztea irratiko 'dida' irratsaioko Jon Gotzonen parte-hartzea ere izango da esketx batean.

Hasteko, 'Xabier Euzkitze' edertasun-produktu sorta ezagutuko dugu. EuskitzEssence lurrina, esaterako, ETBko aurkezle ezagunaren izerdia erabilita sortutakoa da, eta benetako 'euskalover' bihurtuko ditu hura erabiltzen dutenak.

Giputxia ere izango dugu gaur gauean. Kexu ibiliko da, ohi bezala, eta, oraingoan, eskuz banakako pilota finala etengo du. Izan ere, haren ustez, final gehienak Bilboko Bizkaia pilotalekuan izaten dira.

Gainera, Mari Jaia 'Irrikitown' saioko pertsonaia berria izango dugu. Medikuarenera joko du, artikulazio-arazoak baititu besoak jasota ibiltzeagatik.

Eta, azkenik, lehen aipatu dugun moduan, Jon Gotzon ikusiko dugu esketx batean. Zertan arituko ote da 'dida' irratsaioko kidea? Gaur gauean argituko da guztia, 'Irrikitown' saioan.